Samsung presenta unha nova cámara con Wi-Fi e sensor de 20,3 Mpíxeles

Aínda que a mellora das cámaras dos móbiles sexa unha tendencia con moito pulo, esa estrada tamén pode seguirse na outra dirección, dotando ás cámaras cada vez dunha maior conectividade, algo no que parece querer destacar Samsung, fabricante surcoreano que vén de presentar a súa nova SMART Camera NX2000, unha cámara que consegue uns resultados profesionais á vez que facilita compartir imaxes e vídeos cos amigos.
A Samsung SMART Camera NX2000 pode tomar unhas instantáneas impresionantes grazas ao seu sensor CMOS APS-C de 20,3 Mpíxeles, capaz de captar imaxes incluso en condicións de pouca luminosidade, que conseguen unha boa calidade grazas tamén os motor DRIMe IV, que reduce o ruído, mellora a velocidade e consegue unha reprodución das cores máis fiel. A cámara pode funcionar cun rango amplo rango ISO (de 100 a 25.600), pode disparar 8 imaxes por segundo e incluso grava vídeo en Full HD.

A cámara pode equiparse con ata 12 obxectivos intercambiables

Pode controlarse comodamente a través da súa pantalla táctil de 3,7 polgadas, ten 14 modos de escena diferentes e incluso conta cun modo de disparo que toma 5 imaxes consecutivas para elixir a mellor cara da persoa retratada que queiramos conservar. Pode equiparse con 12 lentes intercambiables diferentes mantendo un tamaño bastante compacto, polo que resulta bastante práctica incluso para fotógrafos ocasionais. Entre as súas lentes dispoñibles hai unha que permite dotar á NX2000 de capacidades 3D tanto para fotografía como para vídeo, podendo despois ver os contidos en televisores 3D a través da saída HDMI que incorpora a cámara.
A conectividade desta cámara e Wi-Fi (con Wi-Fi Direct), coa posibilidade de sincronizarse cos dispositivos de xeito doado a través de NFC, contando tamén cunha aplicación de Samsung para móbiles e tablets con Android e iOS, de xeito que faise doado o acceso sen fíos aos contidos captados pola cámara incluso sen contar cun punto de acceso Wi-Fi a man. Os usuarios incluso poden configurar un atallo para poder publicar as imaxes en Facebook con só premer un botón.
A Samsung SMART Camera NX2000, mide 119 x 64,5 x 35,7 milímetros, pesa 228 gramos (sen batería) e sairá á venda en branco, negro e rosa a un prezo de 649,99 dólares nos EE.UU. (497,47 euros), descoñecéndose polo momento a data e prezo coa que chegará ao mercado europeo.