Santiago acolle en novembro o 5º Congreso Internacional de CIOs

luns, 30 de outubro do 2023 S. P.

O Palacio de Congresos e Exposicións de Galicia vai acoller a semana vindeira, os días 7 e 8 de novembro de 2023, a quinta edición do Congreso Internacional de CIOs, organizado pola Asociación para o Progreso da Dirección (APD) e co apoio de empresas tecnolóxicas galegas como é o caso de Altia. O evento, que porá o foco nas claves para entender o impacto da revolución tecnolóxica no noso negocio, analizando, en detalle, o impacto das novas contornas que xa debuxan a IA (Intelixencia Artificial), a tecnoloxía de Cadea de Bloques (Blockchain) ou a Computación Cuántica. Amais, explican dende a organización, o programa deterase “nas revolucións que veñen da man; e que impactan en esferas que nada teñen que ver con algoritmos ou sensores”.
O papel dun CIO
O CIO, polas súas siglas, Chief Information Officer, é o profesional responsábel dos sistemas de Tecnoloxías da Información (TI) da empresa a nivel de procesos e dende o punto de vista da planificación. Así explica APD a relevancia deste posto: “No actual contexto o papel do CIO cobra unha nova dimensión. A alianza da tecnoloxía coa dirección e a estratexia da compañía resulta crítica non só para aspirar o liderado senón para asegurar a supervivencia. Pero para iso, CEO e CIO deben falar nunha linguaxe común que permita despregar decisións dunha complexidade crecente”.
Para APD, a velocidade do cambio é tal, “que aquelas compañías que non situasen as megatendencias tecnolóxicas no centro do seu modelo de negocio corren o risco de colapsar, e non tanto polo efecto estético que supón presentarse ao mercado como unha compañía innovadora, senón polo risco de non poder acceder ao tsunami que está por vir”. E engade a asociación: “É momento de anticiparse e afrontar con máis garantías as revolucións que veñen”.
No congreso participarán (entre outros) Juan Carlos Escotet, presidente de Abanca, Alfonso Rueda, presidente da Xunta, Francisco Botas Ratera, presidente da Zona Noroeste de APD, Xavier Marcet i Gisbert, presidente de Lead To Change, Gorka Sainz, director de enxeñaría de sistemas de Fortinet, Almudena de la Mata, membro da xunta directiva de Alastria, Fernando Vallejo, director de IT, Innovación e Sustentabilidade de Globalvia, e Juan Salom Clotet, coronel xefe da Unidade de Coordinación da Ciberseguridade da Garda Civil. O congreso será conducido pola xornalista Olalla Pena.

PUBLICIDADE