Santiago activa o 2 de novembro o seu servizo de notificacións electrónicas
mércores, 28 de outubro do 2020
O
Concello de Santiago de Compostela porá en marcha en novembro o seu
servizo de notificacións electrónicas. Trátase, en palabras da
concelleira de Economía, Marta Abal, “dun sistema seguro, cómodo
e eficaz que substituirá, para os colectivos obrigados legalmente e
para quen así o elixa, a notificación en papel por correo postal”.
Segundo
engadiu, a este sistema poderán acollerse “as persoas xurídicas
que se relacionen co Concello e as persoas físicas que así o
desexen.
Entrará
en funcionamento o luns 2 de novembro. A partir dese día todas as
notificacións que a Administración local dirixa aos obrigados
legais faranse por medios electrónicos. Amais, serán postas ao
dispor do interesado no apartado privado de notificacións
electrónicas, ao que poderá acceder mediante un certificado dixital
dos admitidos pola sede electrónica do Concello de Santiago de
Compostela ou mediante Cl@ve.
A
notificación electrónica entenderase producida no momento en que o
cidadán poida acceder ao contido do acto notificado, ou ben, se este
acceso non se efectúa, unha vez transcorra o prazo de 10 días
naturais desde que está posta ao seu dispor.
O
Concello enviará un aviso ao enderezo de correo electrónico do
interesado para comunicar que dispón dunha notificación na sede
electrónica. Para iso, solicitará unha dirección de e-mail para o
envío de avisos, que unicamente terán efectos informativos. Así
mesmo, unha vez posta en funcionamento a
sede electrónica do Concello de Santiago de Compostela, na
sección de notificacións electrónicas poderá comunicarse o
enderezo no que se quere recibir os avisos.