Santiago destaca en Alcalá de Henares os seus avances en turismo intelixente

Santiago fixo balance este outubro dos avances turísticos do proxecto para converter a capital de Galicia nunha Cidade Intelixente, o proxecto Smartiago. O balance foi achegado polo concelleiro de Presidencia, Turismo e Relacións Institucionais, Sindo Guinarte, na súa intervención no Congreso de Datos e Intelixencia Artificial no Sector Turístico, en Alcalá de Henares, un foro no que participan especialistas de cidades de toda España compartindo achados en materia de innovación e transformación.
Guinarte dixo que “Smartiago, no apartado de mobilidade intelixente, experimenta coa Intelixencia Artificial a través de sensores instalados no mobiliario urbano para compilar datos que mediante algoritmos, sirvan para previr aglomeracións de persoas, ou prever itinerarios alternativos”.
Amais, sinalou Santiago destaca “pola recuperación do turismo internacional”. Neste momento, engadiu, o número de estadías hostaleiras de estranxeiros está por riba das nacionais, cos turistas de Norteamérica e de Alemaña a cabeza, “o que diferenza a Compostela doutras cidades patrimonio”. Sindo Guinarte tamén resaltou como a capital de Galicia, a través “dos excelentes datos do Aeroporto Rosalía de Castro”, unido á celebración do Ano Santo, está conseguindo alongar a tempada turística e contribuír a un dos obxectivos da Concellería: a desestacionalización turística.
Outros puntos tratados foron a utilización de tecnoloxías avanzadas no ámbito da sinaléctica, que permiten mellorar a experiencia turística, como pode ser a reconstrución de espazos de xeito virtual, ou a posibilidade de coñecer virtualmente a evolución do patrimonio arquitectónico.