Santiago inicia un proxecto piloto para guiar á cidadanía nos seus trámites electrónicos co Concello
mércores, 6 de xullo do 2022
Comezou
o mes de xullo con novidades tecnolóxicas importantes no Concello de
Santiago. En concreto, púxose en marcha un proxecto piloto
anti-fenda dixital para fornecer de asistencia á cidadanía en
materia de trámites na sede electrónica municipal. O proxecto
arrincou coa instalación de equipos específicos en diversos puntos
da cidade e a súa contorna (en principio o Centro Social do
Ensanche, o Rexistro de Galeras e máis a Concellería de Medio
Rural) que permiten ás veciñas e veciños contactar con
traballadores do Concello para facer de guías ou actuar como
representantes do cidadán ante calquera trámite que queira
realizar.
O
alcalde Xosé Sánchez Bugallo presentou o proxecto este primeiro de
xullo, nas dependencias da Concellería de Medio Rural. Segundo
fixo saber, foi desenvolvido polo Departamento municipal de
Modernización da Administración Local que dirixe a concelleira
Marta Abal e o seu obxectivo é “achegarse á cidadanía con máis
dificultades para acceder aos servizos en liña e loitar así contra
a fenda dixital”. Durante a presentación, o rexedor estivo
acompañado polo concelleiro de Medio Rural, José Manuel Pichel e
por Cruz Vázquez Veiga, presidenta da Federación de Asociacións
Veciñais do Rural de Santiago (FERUSA), que probou de primeira man o
funcionamento da nova prestación.
Xosé
S. Bugallo explicou que coa posta en marcha deste novo servizo
“cúmprese o compromiso que adquirimos no pleno do Estado do
Municipio, xa que somos moi conscientes de que os cambios na
Administración Electrónica xeran dificultades nun segmento
importante da poboación, especialmente na zona rural e para as
persoas de maior idade”. O alcalde anunciou que este proxecto, que
se inicia con carácter experimental en 3 puntos, “ampliarase a
máis centros a partir do mes setembro, tanto na cidade como no
rural” e que “para finais de ano, prevese a posta en marcha dun
operativo de asistencia 24 horas, 7 días á semana que poderán
empregar as persoas desde o propio domicilio ou desde calquera lugar
con acceso a Internet”.
Como
dixemos, nesta primeira fase deste proxecto piloto estarán
dispoñíbeis tres equipos: no Centro Sociocultural do Ensanche, no
Rexistro Municipal de Galeras e na sede da Concellería de Medio
Rural no parque empresarial de Costa Vella (rúa da República Checa,
52, 1º - local 105). No futuro, o proxecto podería estenderse a
outras áreas como as de turismo, protección civil, oficina
tributaria, etc.
Trátase
dun proxecto que xa foi implantado con éxito en diferentes zonas do
mundo como para a Comisión de Saúde e Seguridade Social do Estado
de Texas, para os servizos gobernamentais na cidade de Niza ou para
os servizos municipais na cidade de Ashdod (Israel) e que “é a
primeira vez que se leva a cabo en Galicia”, lembrou o rexedor.