Seagate prepara discos duros de 3,5 polgadas con 32 TB de capacidade

Aínda que os equipos informáticos levan anos apostando polo almacenamento en unidades de estado sólido, os discos duros seguen a resultar de grande utilidade cando a prioridade non é a velocidade de acceso senón o volume da información a almacenar, e para atender a esta demanda dende Seagate están a presentar unhas unidades da liña Exos M+ que resultan moi interesantes ao empregar unha tecnoloxía (Mozaic 3+) capaz de almacenar 3 TB por cada placa dos discos, facendo posible unidades de 3,5 polgadas con 32 TB de capacidade.
Esta solución resulta moi atractiva polo aforro de espazo e tamén de enerxía, polo que son unidades de grande interese para provedores de servizos na nube a grande estala, que busquen un rendemento duradeiro e unidades sempre activas.