Seis centros educativos da Coruña seleccionados para participar na V Liga Maker Drone

Os centros CPR San José de Cluny, de Santiago de Compostela; IES Fin do Camiño, de Fisterra; CPR Montespiño, de Culleredo; CPR Cristo Rei, da Coruña; EFAG Fonteboa, de Coristanco; e IES Isaac Díaz Pardo, de Sada, foron seleccionados para participar na V Liga Maker Drone, unha competición tecnolóxico-educativa impulsada pola Fundación Barrié e ITG (Instituto Tecnolóxico de Galicia) que congrega a centros educativos de toda Galicia co obxectivo de fomentar as vocacións STEM entre alumnos de 2° de ESO.
O IES Fin do Camiño, de Fisterra, que a edición pasada recibiu o premio á solución máis disruptiva, tentará repetir o éxito nesta edición.
Os preto de 180 alumnos e alumnas que foron seleccionados para participar na V Edición da liga Maker Drone coñecerán o próximo 30 de outubro nunha xornada formativa na Coruña o reto exposto polos promotores desta iniciativa e que poñerá a proba a creatividade, enxeño e capacidade dos participantes para traballar en equipo.
A formación tecnolóxica representa case o 50% desta iniciativa xa consolidada que se desenvolve ao longo do curso escolar. Así, os participantes reciben unha sesión de introdución á pilotaxe de drons, con formación teórico-práctica sobre a seguridade, o uso, montaxe e mantemento de vehículos aéreos non tripulados; tres sesións de formación sobre materiais e a súa fabricación, mecatrónica e sistemas avanzados; e tres sesións de adestramento en voo. Ademais, os equipos contan con dous kits dron, o soporte técnico e os recursos necesarios para desenvolver a solución ao reto exposto.
Os 18 centros seleccionados proveñen das catro provincias galegas. Da provincia de Pontevedra participan o CPR As Acacias; CPR Montecastelo; e IES Carlos Casares, de Vigo; o CPR Anxo da Guarda, de Nigrán; o CPR Eduardo Pondal, de Cangas; e o IES Ría de Arousa.
Os centros que participan da provincia de Lugo son tres: IES Poeta Díaz Castro, de Guitiriz; IES Francisco Daviña Rey, de Monforte de Lemos; e o CPI Castroverde. De Ourense, pola súa banda, participan o CPR Santa María - Maristas, o CPR Divina Pastora e CPR María Auxiliadora - Salesianos.
Por último, da provincia da Coruña van participar seis centros: CPR San José de Cluny, de Santiago de Compostela; IES Fin do Camiño, de Fisterra; CPR Montespiño, de Culleredo; CPR Cristo Rei, da Coruña; EFAG Fonteboa, de Coristanco; e IES Isaac Díaz Pardo, de Sada.