Senén Barro expón os avances do CiTIUS no foro Future Trends de Madrid

Á 20ª edición do foro Future Trends, que se levou a cabo esta semana (do 12 ao 14 de xuño en Madrid) promovido pola Fundación Innovación Bankinter, acudía Senén Barro, director científico do CiTIUS para falar das liñas de investigación do centro con potencial aplicación no eido da neurotecnoloxía.
“Hoxe só mencionarei tres; pero, dunha maneira ou outra, todas as liñas de investigación do CiTIUS teñen unha potencial aplicación na neurotecnoloxía”. Con estas palabras comezaba Senén Barro a súa intervención no foro Our future selves: from repairing to enhacing human capabilities.
Ao longo da súa intervención neste encontro, enmarcada nun panel titulado Entidades de Intelixencia artificial e Neurociencia, o máximo responsábel do CiTIUS compartiu cartel con Viktor Jirsa, director científico de EBRAINS: unha nova infraestrutura dixital de investigación financiada pola Unión Europea a través do Proxecto Cerebro Humano, que reúne unha ampla gama de datos e ferramentas para a investigación relacionada co cerebro.
Tras unha breve introdución sobre o centro e o seu persoal, Senén Barro debullou algúns dos resultados recentes do CiTIUS. Salientou as achegas recentes na área do deseño de chips intelixentes: “un dos principais resultados da nosa área científica relacionada co deseño electrónico de dispositivos intelixentes é o desenvolvemento dun recolector de enerxía luminosa biocompatíbel e totalmente autónomo”, indicou. “Partindo dunha cantidade ínfima de enerxía -que podería achegar o propio organismo- podemos amplificala para alimentar outros chips -como sensores- en calquera parte do corpo, incluído o cerebro”. Tamén na área de deseño de chips citou a participación do centro no proxecto MISEL, “cuxo obxectivo é levar a intelixencia artificial ao propio hardware” (*edge computing), “*e conseguir un sistema de visión autónomo e bioinspirado, optimizado tanto en tamaño com en peso ou consumo”. Un proxecto que abre o camiño a unha nova xeración de dispositivos “potencialmente implantábeis, mesmo no cerebro”.
Asemade, o director científico citou tamén o traballo desenvolvido no Laboratorio de R ealidades Intangibles do CiTIUS, implicado en como pode empregarse a Realidade Virtual multi-persoa en contribucións a eidos como a simulación científica, a visualización de datos ou a educación. “Un dos resultados máis recentes e interesantes demostra que a RV pode producir efectos perceptivos comparábeis aos das drogas psicodélicas, sen os seus riscos asociados”, engadiu.
Finalmente, Senén Barro aludiu á liña de investigación centrada no paradigma de Aprendizaxe Federada: “aplicamos esta técnica para detectar automaticamente a actividade física dunha persoa, simplemente usando os sensores inerciais do seu smartphone”, afirmou. “Pero tamén é posíbel, por exemplo, diagnosticar as primeiras fases da doenza de Alzhéimer a partir dos patróns de movemento durante a nosa vida cotiá, ou diagnosticar a enfermidade de Párkinson a partir dos patróns de escrita nos teclados dos dispositivos persoais, cando a enfermidade comeza a aparecer”. O director do centro fixo fincapé nun dos asuntos clave, a privacidade da información: “unha das características da Aprendizaxe Federada é que os datos que se obteñen de cada dispositivo só se empregan para aprender un modelo local, que será o que posteriormente se utilice no marco dun modelo global. “A principal vantaxe diso é que este modelo global achega mellores resultados de saída que os modelos locais e, ao mesmo tempo, é capaz de preservar a privacidade dos usuarios, porque os datos que serven para crear o modelo exportado nunca chegan a saír dos dispositivos, respectando así a intimidade das persoas”. Para rematar engadiu que: “Sen dúbida, as posibilidades das neurotecnoloxías e a IA son enormes, e aínda están por descubrir e desenvolver”.