Seresco enxalza na presentación de Nubia a importancia da transformación das empresas
xoves, 12 de marzo do 2020
Seresco,
firma tecnolóxica galega con sede en Vigo, presentou este xoves 12 a
súa revolucionaria plataforma de xestión empresarial na sede AEMOS
(Asociación de Empresarios de Mos), a
plataforma Nubia, unha ferramenta que, segundo fixo saber a
compañía viguesa, “permite mellorar até nun 10,5% a
produtividade dos negocios”, amais de optimizar e facer máis
eficaces e eficientes as tarefas e o control da calidade.
Seresco,
na sesión, tamén puxo o foco nas portas que abre Nubia en materia
de transformación e adaptación aos novos tempos: uns tempos que
esixen ás empresas as máximas dixitalización e inmediatez, ao
tempo que brinda un escenario onde será fundamental que estean
presentes, grazas á nube e aos novos servizos TIC, na máxima
cantidade de sitios posíbeis.
Nubia
é unha plataforma baseada na Internet das Cousas (IoT) e na
computación na nube especializada na execución e no seguimento de
procesos de verificación en traballos cun “alto compoñente de
mobilidade”, explicou Carmen Díaz, responsábel de Proxectos para
a Transformación Dixital de Seresco, engadindo que son (en boa
medida) as esixencias en mobilidade e en volume de proxectos as que
requiren sistemas de información conectados e integrados. Neste
punto, dixo, Nubia automatiza procesos, permite xerar alertas e
informes en industrias de gran dimensión operativa como o metal e a
construción, e integra a chamada cadea de valor de grandes proxectos
de forma sinxela e visual.
A
aplicación permite “un uso multidispositivo e unha tramitación
rápida, sinxela e segura do labor de verificación de tarefas”.
Amais, salientou Carmen Díaz, adáptase a calquera modelo de
traballo, executa copias de seguridade automatizadas e inclúe, por
outra banda, recoñecemento de voz para facilitar o traballo sobre o
terreo e axilizar a introdución de información nos eidos que
requiren unha descrición detallada como observacións, explicacións
de incidencias ou definicións de solucións.
Tamén
xera mapas de cor mediante xeolocalización para analizar de maneira
rápida e visual os proxectos, de tal maneira que pode comparar
xeograficamente a carga de traballo e a dos diferentes equipos.