SmartPEME achega dous novos obradoiros centrados na SEO e a Intelixencia Artificial

A Deputación de Pontevedra, a través do programa SmartPEME de asesoramento tecnolóxico para pemes e persoas autónomas, oferta esta semana dúas novas accións formativas telemáticas enmarcadas na súa carteira de obradoiros. As actividades, previstas para os días 22 e 23 de novembro, abordarán cuestións relacionadas coa iniciación ao posicionamento en buscadores, redes e webs (SEO) e a Intelixencia Artificial.
O mércores 22, de 17.00 a 18.00 horas, celebrarase obradoiro de Iniciación ao SEO II: Optimiza a túa páxina web para gañar visibilidade. Esta acción formativa afondará nos factores externos que afectan ás páxinas web e que inflúen no seu posicionamento, así como as mellores prácticas SEO e a forma de medilas con analítica web para comprender e optimizar os resultados. O obradoiro será impartido por Adrián Fernández, licenciado en Comunicación Audiovisual con experiencia asesorando empresas do ámbito da comunicación dixital e a mercadotecnia en liña.
O xoves 23, ás 12,00, dará comezo o taller Intelixencia Artificial I, que é e como funciona, onde se iniciarán os procesos de clasificación de imaxes empregando unha rede neuronal e unha placa de desenvolvemento Jestson Nano. Amais, realizaranse dúas prácticas coa intención de que o usuario sexa quen de configurar unha rede neuronal para as tarefas de clasificación de imaxes, recoñecemento de expresións faciais e o movemento autónomo dun robot de adestramento.