SmartPEME achega seis novos obradoiros TIC entre o 19 e o 23 de xuño

A Deputación de Pontevedra, a través do programa de capacitación tecnolóxica SmartPEME, organiza na semana do 19 ao 23 de xuño seis novas accións formativas enmarcadas na súa carteira de obradoiros para persoas autónomas, pequenas e medianas empresas e profesionais. A media ducia de actividades programadas desenvolveranse de xeito telemático e presencial. Os obradoiros serán sobre o uso do antivirus e as actualizacións do software, fabricación dixital, packaging, deseño gráfico, a viabilidade dun proxecto emprendedor e finanzas.
As accións formativas inícianse o luns 19, ás 10:00 h, con Ciberseguridade, Antivirus e actualización do software. A finalidade deste taller telemático é promover as actualizacións do software para previr as vulnerabilidades e o uso dos antivirus. Será impartido polo experto universitario en robótica, programación e impresión 3D Manuel Freire.
O martes 20 haberá dúas actividades formativas. A primeira ás 11:00 h co título Fabricación dixital. Laminador resina preparación de impresiones, a cargo de Manuel Freire. O obradoiro enmárcase no itinerario formativo que abrangue unha primeira parte teórica online e unha segunda parte presencial con prácticas no Fab Lab do Centro Provincial de Economía Dixital no Viveiro de Empresas de Barro. As persoas asistentes formaranse no manexo de debuxo 3D con Onshape (16h), impresoras 3D de filamento (8h), impresoras 3D de resina e escáner 3D (2h). Xa pola tarde, ás 17.00 h, impartirase telematicamente Packaging, todo o que necesitas saber para o teu e-commerce que aportará os coñecementos que se precisan para realizar a embalaxe, dende a forma de envío, até os parámetros de sustentabilidade que cómpre ter en conta, ou os elementos experienciais. O taller será dirixido por Fátima Faílde, licenciada en Publicidade e Relaciones Públicas pola Universidade de Vigo con experiencia en comunicación corporativa, deseño gráfico e imaxe corporativa.
O mércores 21, ás 17.00 h, celebrarase unha acción formativa telemática centrada na Xerarquía no deseño: a orde da información. Nela, daranse a coñecer métodos para xerar máis atención visual e analizaranse os deseños para poder aplicalos a un propio. Lara Taboada, titulada superior en Ensinanzas Artísticas de Deseño Gráfico, con experiencia en fotografía de produto e composición fotográfica creativa, será a encargada de impartir a actividade.