SmartPEME achéganos seis novas formacións tecnolóxicas entre o 25 e o 28 de setembro

A Deputación de Pontevedra, a través do programa SmartPEME de asesoramento tecnolóxico para pemes e persoas autónomas, oferta na semana do 25 ao 28 de setembro seis novas accións formativas centradas nas TIC. Porán o foco na ciberseguridade, no emprendemento, na visualización en buscadores (posicionamento SEO), no manexo de Chat GPT e Stable Diffusion e no uso de WhatsApp Business para alugueiro vacacional.
Este luns 25 ás 10 horas celebrarase o obradoiro Ciberseguridade, que é o malware, cuxo obxectivo é dar a coñecer que é un programa malicioso e os diferentes tipos que existen, así como aprender a detectar se o noso equipo está infectado. O taller correrá a cargo de Manuel Freire, experto universitario en robótica, programación e impresión 3D.
O martes 26 ás 12 horas dará comezo o taller A iniciativa emprendedora para dar a coñecer as razóns para crear unha empresa, os requisitos que debe reunir a persoa emprendedora e as recomendacións para iniciar o proxecto empresarial. Paz Ares, licenciada en Ciencias Económicas e Empresariais pola Universidade de Vigo será a encargada de impartir a formación.
O mércores 27 ás 12 horas iniciarase SEO para e-commerce: Posiciona a túa tenda en liña en Google. Este obradoiro está especializado nas tendas en liña e céntrase en ensinar ás persoas participantes a optimizar a web e a mellorar a súa visibilidade en Internet. A docente será Esther Garcinuño, diplomada en Ciencias Empresariais con experiencia en deseño, desenvolvemento e dirección de proxectos web.
Na mesma xornada do mércores, ás 17 horas, comezará o taller complementario Redacta os textos da túa web ou tenda online para posicionarte en Google que ofrecerá as claves para acadar bos resultados nas procuras a través da redacción, tendo en conta as estratexias de contidos e empregando ferramentas para escoller as palabras clave. O taller será impartido por Laura Carrera, graduada en Publicidade e Relaciones Públicas con experiencia como asesora de comunicación e mercadotecnia dixital.
O xoves 28 realizaranse outros dous obradoiros telemáticos. O primeiro será de mañá, ás 12 horas, e dá continuidade ao novo itinerario formativo dedicado á Intelixencia Artificial con Chat GPT e Stable Diffusion, aprende o seu funcionamento II, para coñecer o manexo das ferramentas. O taller será impartido polo experto universitario en robótica, programación e impresión 3D, Manuel Freire. O segundo, na quenda de tarde, dará comezo ás 17 horas co título WhatsApp Business para alugueiro vacacional. O obxectivo deste obradoiro, impartido por Sonia Torres, é ensinar a empregar WhatsApp Business como ferramenta de mercadotecnia no sector turístico.