SmartPeme+ achega cinco novos obradoiros para incrementar a nosa competitividade empresarial

A Deputación de Pontevedra organiza esta semana 5 novos obradoiros de capacitación tecnolóxica ao abeiro da Rede SmartPeme+. As accións, en formato telemático e presencial (todas elas requiren inscrición previa), celebraranse do luns 20 ao xoves 23 de outubro e afondarán en cuestións de interese para o tecido empresarial da provincia como a mercadotecnia por correo electrónico, o posicionamento en buscadores, o perfil de empresa en Google e a edición de vídeos no móbil, entre outros.
Este luns 20 de outubro celebrarase o obradoiro telemático Sácalle proveito ao email marketing con Brevo, a partir das 12:00 horas organizado pola oficina de Lalín. Porase o foco na mercadotecnia a través de correo electrónico, unha ferramenta esencial na estratexia de promoción empresarial dixital. As persoas participantes aprenderán sacarlle o máximo partido empregando Brevo para mellorar a súa produtividade. A sesión será impartida por Fátima Faílde, licenciada en Publicidade e Relacións Públicas con experiencia en comunicación corporativa, e as inscricións pódense realizar en liña.
O martes 21 de outubro ás 12:00 celebrarase o obradoiro en liña AI Overviews: novas regras para clasificar en primeiro lugar en Google coordinado pola oficina do Porriño. Esta sesión abordará como a chegada de AI Overviews a Google fai que o buscador por excelencia responda con resumos xerados pola Intelixencia Artificial, cambiando completamente a forma en que se descobre, clasifica e consume o contido. Aspectos como que son as descricións xerais da IA, como funciona e que se pode facer para manter o contido relevante e visible serán explicados por Esther Garcinuño, diplomada en Ciencias Empresariais con experiencia en desenvolvemento de proxectos web. As inscricións están abertas na Rede.
O mércores 22 de outubro tamén ás 12:00 horas a oficina de Pontevedra organiza o obradoiro telemático Promociona o teu negocio co Perfil de empresa de Google. As persoas participantes aprenderán en que consiste esta ferramenta do buscador, enfocada a negocios locais que busquen unha maior visibilidade. O perfil de empresa de Google está pensado para facilitar o aproveitamento por parte dos pequenos comercios das posibilidades da xeolocalización nas procuras da súa potencial clientela. Adrián Fernández, licenciado en Comunicación Audiovisual con experiencia asesorando empresas de diversos sectores no ámbito da comunicación e márketing dixital, será o encargado de impartir a sesión, e as inscricións están abertas en liña.
O xoves 23 de outubro ás 12:00 a través da oficina de Porriño celebrarase o obradoiro en liña Edita vídeos facilmente desde o teu Smartphone: Edits. Lara Taboada, licenciada en deseño gráfico con experiencia en composición fotográfica creativa, ensinará a crear vídeos para as redes sociais de xeito sinxelo e creativo. Edits permite recortar e organizar clips, aplicar transicións, efectos e filtros, e engadir subtítulos para darlle a cada proxecto un estilo único. As persoas interesadas poden inscribirse no formulario habilitado.
Tamén o xoves 23 ás 17:00 horas a oficina de Cambados organiza a sesión presencial Aplicacións de IA para automatizar procesos na túa empresa II no Centro ExpoSalnés. Nesta sesión, afondarase no uso de Make para levar as automatizacións dun negocio ao nivel intermedio. José Luis Taboada, asesor da oficina de Cambados con máis de 25 anos de experiencia en sistemas informáticos, será o encargado este obradoiro e as inscricións pódense facer en liña.
A Deputación destina este ano 1,45 millóns de euros á Rede SmartPeme+ e Acelera Pyme Rural para asesorar persoas emprendedoras desde as oficinas de Barro, Cambados, Lalín, Ponteareas, Pontevedra, O Porriño e Vigo. Desde esta rede lévanse a cabo actividades formativas relacionadas co crecemento empresarial e a transformación dixital, asesorando a ata 2500 emprendedores, autónomos e pemes ao ano e impartindo arredor de 200 talleres formativos e actividades complementarias.