SmartPeme+ pon no foco no almacenamento na nube e nos servizos automatizados

A Deputación de Pontevedra organiza esta primeira semana de agosto dous novos obradoiros de capacitación tecnolóxica ao abeiro da Rede SmartPeme+. As accións, en formato telemático (todas elas requiren inscrición previa), celebraranse o martes 5 e o mércores 6 de agosto e afondarán en cuestións de interese para o tecido empresarial da provincia como son o almacenamento na nube e a prestación de servizos automatizados de atención á clientela.
O martes 5 de agosto celebrarase o obradoiro en liña A túa información sempre a man: almacenamento na nube, a partir das 11.00 horas organizado pola oficina SmartPeme de Ponteareas. O obradoiro busca orientar as empresas e autónomos cara a unha mellora dos seus sistemas de almacenaxe actuais a través dos novos servizos ofrecidos na Internet, reducindo custos e garantindo un mellor tempo de actividade dos servizos mencionados. A sesión será impartida por Laura Carrera, graduada en Publicidade e Relacións Públicas, que conta cunha ampla experiencia asesorando empresas de diversos sectores no ámbito da comunicación e a mercadotecnia dixital. As inscricións pódense realizar no formulario habilitado.
Por último, o mércores 6 de agosto, tamén ás 11.00 horas, celebrarase o obradoiro ChatBot, a automatización da atención ao cliente coordinado pola oficina do Cambados. Este obradoiro tratará de contextualizar e mostrar que é e como utilizar os ChatBot como modelo da automatización da atención ao cliente. A sesión incluirá ferramentas para crear un, así como un caso práctico para Facebook. Será impartida por José Luis Taboada, asesor na propia oficina con máis de 25 anos no sector e especializado en sistemas informáticos, e as inscricións pódense realizar no formulario xa dispoñible.
A Deputación destina este ano 1,45 millóns de euros á Rede SmartPeme+ e Acelera Peme Rural para asesorar persoas emprendedoras desde as oficinas de Barro, Cambados, Lalín, Ponteareas, Pontevedra, O Porriño e Vigo. Desde esta rede lévanse a cabo actividades formativas relacionadas co crecemento empresarial e a transformación dixital, asesorando a ata 2500 emprendedores, autónomos e pemes ao ano e impartindo arredor de 200 talleres formativos e actividades complementarias.