SonRías Baixas introduciu as tecnoloxías cashless nos festivais galegos
venres, 11 de agosto do 2017
- Fotografías de Alba Sotelo para o SonRías Baixas
O festival SonRías Baixas celebrouse os días
pasados en Bueu (do 3 ao 5 de agosto) e foi unha nova mostra do seu
poder de convocatoria (en relación a bandas pero, sobre todo, en
relación ao público) e, tamén, da súa arela de ir alén do
musical e converterse nun certame referente no uso de novas
tecnoloxías. Esta aposta polo dixital materialízase en primeiro
lugar na páxina web, sonriasbaixas.info,
e máis as súas contas nas redes sociais (Facebook,
Twitter, YouTube)
para logo poñerse aínda máis “vangardista” coas metodoloxías
empregadas para o propio funcionamento e xestión do festival e da
afluencia de público. Nun plano máis concreto, pasa por ser a
primeira cita musical galega que emprega pulseiras cashless
para posibilitar o acceso aos concertos e para poder facer os pagos
de comida, bebida e material de promoción. Que se consegue con isto?
Pois, de boas a primeiras, ceibar aos seareiros da “carga” de
carrexar con eles, no festival, diñeiro en efectivo ou cartóns
bancarios.
Segundo
reflicten dende Ocioengalicia.com, todo isto foi unha realidade
grazas á tecnoloxía de chips RFID implantada no recinto. Máis
polo miúdo, os impulsores do certame dispuxeron de 85 aparellos de
punto de venda, troco de entradas, recarga e control de acceso.
Ademais, contouse con tres liña de fibra do operador galego R e seis
liñas 4G sen límite de tráficos de datos da compañía Vodafone.
Por outra banda, no plano comunicativo e da produción, o festival
foi apoiado e cuberto por case 60 profesionais de diversos medios de
comunicación, amais de xuntar cinco equipos de gravación
audiovisual traballando de maneira simultánea durante o evento.
- Así locen as pulseiras cashless empregadas no SonRías Baixas