Sony podería ter abandonado a fabricación de móbiles

Hai pouco que se presentou o Xperia 1 VII, o último móbil insignia de Sony, e aínda que sexa un smartphone de alta gama cun prezo de venda oficial de 1.499 euros, podería estar a marcar un punto e aparte na liña de smartphones, xa que dende Xapón informan de que Sony xa non estaría a producir os teléfonos nas súas fábricas en Tailandia e China, senón que recorrería a fabricantes externos.
Aseguran que tal cambio non sería algo anecdótico, senón que suporía un cambio de política por parte de Sony, o que non tería por que afectar á calidade dos produtos, aínda que si ao compromiso de Sony cos mesmos, facendo temer que a compañía nipoa podería rematar abandonando o sector da telefonía móbil, o que tampouco resultaría traumático, xa que actualmente teñen unha presenza comercial meramente anecdótica.
En calquera caso, aínda que os móbiles da marca Sony poidan seguir lanzándose ano tras ano, xa non podemos considerar a Sony un fabricante de móbiles.