Sony presenta novos auriculares sen fíos con cancelación de ruído

Sony vén de presentar os seus novos auriculares sen fíos con cancelación de ruído, son confortable, axuste firme e son inmersivo, os WF-C700N, que destacan especialmente por contar con prestacións avanzadas a un prezo relativamente contido: está previsto que cheguen ás tendas o 14 de abril a un prezo de 129,99 euros.
O deseño dos auriculares WF-C700N aposta pola ergonomía, para que poidan usarse durante todo o día, gozando de son en alta calidade (grazas á tecnoloxía DSEE e ao controlador exclusivo de Sony) e de chamadas fiables grazas a un micrófono integrado de alta calidade e a unha estrutura de redución de ruído contra o vento.
A tecnoloxía de cancelación de ruído permite escoitar música eliminando o ruído de fondo, o que pode alternarse co modo de son de ambiente (que transmite os sons que hai ao redor sen ter que quitar os auriculares). Grazas á aplicación dos auriculares é posible estar escoitando música illándose do ruído do contorno, por exemplo, nunha cafetería, e se falamos para pedir algo, tirar proveito da función de Enfoque de Voz para poder conversar sen quitar os auriculares. Tamén é posible empregar o son adaptativo, para que os auriculares recoñezan os lugares que máis visitamos para empregar a configuración que máis encaixe con cada situación.
Os auriculares conta con conectividade multipunto (ou sexa, poden conectarse a dous dispositivos á vez, de xeito que se estamos escoitando o son do ordenador e chega unha chamada ao móbil, podemos atendela sen problema); son compatibles con asistentes de voz; contan con resistencia IPX4 (soportan salpicaduras e a suor); e a súa batería dura até 10 horas (7,5 horas coa cancelación de ruído activada) de reprodución continua ou até 5 horas de chamadas.