Spotify estrea un sistema de mensaxería para compartir contidos

Spotify anuncia o lanzamento de Messages, unha nova función dentro da súa aplicación que permitirá compartir contidos musicais, podcasts e audiolibros cun círculo próximo de amigos e familiares dun xeito máis directo.
A nova ferramenta, que comeza a despregarse esta semana para usuarios maiores de 16 anos con plans gratuítos e de pagamento nalgúns mercados, centraliza nun único lugar o contido de Spotify que xa se compartía a través de múltiples canles. Messages busca facilitar tanto a conversa arredor da música, podcasts ou libros, como a difusión de novos artistas, autores e creadores.
O funcionamento baséase en conversas privadas nas que se pode enviar contido de Spotify acompañado de texto e emoticonas. Para iniciar un chat, abonda con tocar o botón de compartir na vista de reprodución e seleccionar o destinatario. O acceso realízase a través da foto de perfil, situada na esquina superior esquerda da aplicación. Ademais, Spotify suxire contactos cos que xa houbo interacción previa, como listas colaborativas, Blends ou Jams, así como membros dun plan Familiar ou Duo.
A compañía recalca que esta opción non substitúe as integracións con Instagram, Facebook, WhatsApp, TikTok ou Snapchat, senón que pretende complementalas. Do mesmo xeito, insiste en que os usuarios manteñen o control: poden aceptar ou rexeitar solicitudes, bloquear contactos, denunciar mensaxes ou desactivar a función desde o apartado de axustes. Para garantir a seguridade, as conversas están protexidas con cifrado estándar tanto en tránsito coma en repouso, e a plataforma aplicará tecnoloxías de detección proactiva para frear contido ilícito ou prexudicial, combinado coa revisión dos moderadores en caso de denuncias.
Spotify avanza que esta é só a primeira fase dun desenvolvemento que continuará ampliándose e perfeccionándose nos vindeiros meses a nivel global.