Spotify inicia a transcrición automática de podcasts

xoves, 28 de setembro do 2023 Marcus Fernández

Ao estrear a dobraxe de podcast mediante IA en Spotify puidemos ver como os episodios afectados incluían transcrición a texto do contido, algo que podería parecer trivial, xa que para poder realizar a tradución é preciso recoñecer o que se di nos podcasts, e conscientes da utilidade de tal función anuncian a estrea de transcricións automáticas e sincronizadas para máis creadores e podcasts, o que supón unha clara mellora de accesibilidade, á vez que tamén fai máis doado localizar momentos dun podcasts, xa que premendo sobre un fragmento de texto podemos mover a reprodución a tal punto.
Aínda que agora xa podemos atopar bastantes podcasts coa opción de transcrición activa, Spotify anuncia que nas vindeiras semanas levarán as transcricións a millóns de episodios listados no seu servizo, adiantando que no futuro tamén pretenden incorporar a posibilidade de incluír contidos multimedia nas transcricións, como unha forma de engadir unha maior profundidade aos podcasts que consumamos.
Os capítulos dentro dos podcasts tamén pasan a estar dispoñibles globalmente, de xeito que será máis doado moverse entre seccións e temas tratados dentro dos podcasts.
Tamén están a mellorar as páxinas nas que se presentan os podcasts, para presentar máis información e que así os usuarios poidan saber máis antes de lanzarse a escoitar un podcast completo.

Actualmente xa hai podcasts en Spotify transcritos automaticamente, pero nas vindeiras semanas tal funcionalidade chegará á meirande parte dos episodios publicados

PUBLICIDADE