Star Wars: The Old Republic chegará a Europa o 22 de decembro

Os afeccionados á saga espacial de George Lucas están ansiosos por achegarse ao seu universo en liña grazas ao xogo Star Wars: The Old Republic, desenvolvido por BioWare e LucasArts, e do que finalmente xa sabemos a data de lanzamento, que será o 22 de decembro en Europa (2 días despois da estrea norteamericana), incluíndo co produto 30 días de subscrición ao xogo, tempo que poderá ampliarse en tramos de 1, 3 e 6 meses por 12,99, 35,97 e 65,94 euros respectivamente.
De todos os xeitos, os usuarios que conten cun código de pre reserva do xogo (lembremos que xa hai 3 edicións dispoñibles para a súa reserva) poderán acceder un tempo antes a este título que promete xuntar a milleiros de seareiros da saga de Star Wars repartidos por todo o mundo.
Este xogo, que seguirá unha liña semellante a grandes éxitos como World of Warcraft, terá que superar o reto de conseguir manterse como xogo masivo multi xogador en liña de pagamento, algo que practicamente só están a conseguir dende Blizzard, mentres que o resto de competidores tiveron que ir pasando a fórmulas free-to-play para poder manterse no mercado, aínda que o peso da franquía que ten detrás permitiralles ter medio camiño andado.

Trailer do xogo