Steve Jobs descúlpase pola rebaixa de prezo do iPhone agasallando ós seus compradores 100 dólares de desconto en tendas Apple

Trala rebaixa de 200 dólares nos seus iPhone, Steve Jobs veuse forzado a reaccionar ante a irritación dos consumidores que pagaron o prezo orixinal polo teléfono de Apple durante os últimos 2 meses, e publicou na web da súa compañía unha carta aberta na que asegura que a gran rebaixa no iPhone está a producirse nun momento axeitado pero promete un crédito de 100 dólares para mercar produtos en calquera tenda de Apple (tanto física coma virtual).
Jobs descúlpase polas molestias que causaron a moitos compradores que se sentiron defraudados por ver como o seu novo terminal baixaba de prezo a poucas semanas da súa compra e, de feito, poderiamos dicir que o seu prezo orixinal só se mantivo durante unhas 7 semanas (xa que quen o mercase nas últimas 2 semanas recibirá un reintegro de 200 dólares) o que fai quedar mal ós early adopters, aínda que o presidente de Apple recoñeceu que é un risco que toman os que mercan os produtos máis novos, mentres que os que esperan a rebaixas ou novas prestacións poderían estar agardando infinitamente (sempre haberá mellores produtos futuros).
O mercado económico tampouco parece recibir moi ben todos estes anuncios de rebaixas e descontos, polo que Apple veu baixar a súa cotización bolsista un 1,3% no NASDAQ.