Steve Jobs presenta versións renovadas de iMac, iLife e iWork

martes, 7 de agosto do 2007 Marcus Fernández

Jobs amosa os novos iMac de 20 e 24 polgadas

Este martes Steve Jobs realizou unha agardada presentación na que se verían os novos modelos de ordenador iMac, feitos de vidro e aluminio e cun novo teclado máis delgado. Os novos equipos se venderá en versións de 20 e 24 polgadas, de xeito que a pantalla de 17 polgadas desaparecería da oferta de Apple coma se viña rumoreando nos pasados meses.

Novo deseño do iMac

Aparecen así dous iMac de 20 polgadas a 1.169 e 1.399 euros e outros de 24 polgadas a 1.699 e 2.159 euros, o que supón unha rebaixa de preto de 200 euros con respecto dos modelo equivalentes anteriores, cun prezo inicial máis elevado (o iMac de 17 polgadas custaba dende 937 euros). Así os novos iMac incluirían un procesador Core 2 Duo/Extreme a 2,0/2,4/2,8 GHz, 1/2/4 Gb de memoria, unha tarxeta gráfica ATI Radeon HD, 256/320/512 Gb/1 Tb de disco e conectividade IEEE 802.11n e Bluetooth 2.0. Na súa parte traseira contan con conectores FireWire 400 e 800, 3 portos USB 2.0, tomas de son, Gigabit Ethernet e saída de vídeo.
Se ben os rumores de renovación do iMac resultaron ser certos, a desaparición do Mac mini parece estar pouco fundamentada, xa que durante o evento anunciaron que veñen de renovar os seus procesadores para que sexan equipos máis potentes.

Renovación do software

iMovie fai máis doada a edición de vídeo

Jobs tamén presentou novas versións da súa familia de aplicacións iLife, destacando como o iPhone interactúa coa .Mac Web Gallery (os servizos de almacenamento en liña de Apple pasan de 1 Gb a 10 Gb) para publicar de xeito doado as nosas fotografías na web (tanto de xeito individual como agrupadas en galerías).
O iMovie tamén se renova profundamente, facendo máis doado o seu uso, e permitindo a rápida montaxe de clips así como a súa publicación na .Mac Video Gallery ou en YouTube, de xeito que en poucos minutos xa podemos amosar as nosas creacións ó mundo enteiro.

Number mellora a presentación de datos e gráficos

A nova aplicación de montaxe de vídeo tamén soporta novos modelos de cámaras dixitais para a captura dende as mesmas, así como os formatos DV, HDV e mesmo AVCHD (alta definición en MPEG-4).
Tamén se actualizan as aplicacións iWeb, iDVD e GarageBand, destacando unha funcionalidade desta última, Magic GarageBand, que permite crear o acompañamento ás interpretacións propias en moitos estilos que van dende o rock ata o jazz.
O paquete ofimático de Apple, o iWork, tamén se renova, incorporándose moitos moldes novos para Keynote (o programa de presentacións) e Pages (o procesador de texto), incorporándose a esta familia Numbers (unha folla de cálculo deseñada para traballar coas outras dúas aplicacións, que mellora considerablemente o xeito de ver táboas de datos).
Os paquetes de aplicacións iLife’08 e iWork ’08 xa están á venda por 79 euros na tenda en liña de Apple (aínda que os usuarios que merquen un Mac novo terán o iLife de balde).

PUBLICIDADE