Super Mario Bros. 3 prepara a súa chegada á Consola Virtual de Wii U e 3DS

Non parece haber dúbidas ao repasar a historia dos xogos da saga de Super Mario Bros. que a mellor entrega clásica foi a terceira, estreada en 1988 para a primeira consola Nintendo de 8 bits (e que non puidemos ver en España ata 1991) e na que aparecía por primeira vez o traxe de tanooki (que tan ben recibido foi en Super Mario 3D Land para Nintendo 3DS). Pois parece que este grande xogo vai estar dispoñible na Consola Virtual para Wii U e Nintendo 3DS nas vindeiras semanas, pois xa figura como título de próximo lanzamento na páxina web norteamericana de Nintendo.
Super Mario Bros. 3 permite percorrer 7 mundos nos que Mario e Luigi enfrontaranse a novos inimigos á vez que fan uso de numerosos powerups que fixeron escola (a super folla, o traxe de ra ou o martelo); elementos que fixéronlle converterse nun dos xogos de Mario mellor valorados, que de seguro que moitos quererán recuperar nas consolas actuais.