Talentia Summit 2020 acelera a transformación dixital contra a COVID-19
xoves, 26 de novembro do 2020
Este
venres 27 de novembro pecha as súas portas, virtuais desta volta, o
evento Talentia
Summit‘20, a feira virtual de emprego de referencia que
resultou a edición máis seguida con máis de 43.000 usuarios
activos e 300.000 visitas a páxinas.
Emporiso,
será mañá cando o dito evento chegue ao seu fin mediante o Foro
estratéxico de clausura, que terá lugar en directo vía streaming
ás 18 horas a través da web
Talentiasummit.com e o cal xa conta con máis de 2.000 usuarias e
usuarios rexistrados. A organización convida a realizar o rexistro
previo para recibir información ampliada e notificación do comezo
do evento. Informar que a clausura do Talentia contará coa presenza
do alcalde de Santiago, Xosé Sánchez Bugallo; do presidente da
Xunta, Alberto Núñez Feijóo; e do ministro de Ciencia e Innovación
Pedro Duque, que participará de xeito telemático.
Cómpre
salientar que esta edición do Talentia Summit tivo que mudar de
formato e adaptarse aos novos tempos que corren, que por mor da
situación sanitaria actual provocada pola pandemia mundial da
COVID-19, pasou a ser unha feira virtual de emprego. Con acceso en
liña para os múltiples servizos que achega esta feira, esta
converteuse nun punto de encontro dixital entre empresas,
organizacións e un público comprometido co desenvolvemento do
talento e o emprego. Dende Talentia subliñan o éxito desta
convocatoria e fano mediante cifras: 300.000 páxinas vistas da web
dende a apertura da inscrición, 43.000 usuarias e usuarios, 2.500
usuarias e usuarios nos cursos de formación, 3.000 citas virtuais
coas empresas presentes para entrevistas de traballo e 800 sesións
de mentoring e orientación laboral.
As
empresas amosaron o seu interese e apoio ao evento, compartindo
información da feira a través da súa web e redes sociais. Un dos
puntos fortes de Talentia Summit son as ofertas de emprego activas
que publicaron as máis de 80 empresas e centros de investigación
participantes nesta edición. Foron moitas inscricións nas máis de
300 ofertas de emprego, para un total de 700 postos de traballo.
E
indo ao acto de mañá, este consistirá nun foro de conferencias
estratéxicas no que participarán expertos-as, que dende os seus
sectores exporán como superar a incerteza na actualidade. As
conferencias serán as seguintes: Juan Carlos Alcaide, experto en
experiencia cliente falará da Actitude para superar a incerteza.
María José Alonso (Catedrática de Farmacia e Tecnoloxía
Farmacéutica da USC e adscrita ao CiMUS), coa conferencia Misión
C19. A ciencia ao servizo dunha vacina. Joaquín "Kin"
Martínez (codirector do festival "O Son do Camiño" e
presidente da Federación ES Música), compartirá o devir dun sector
tan afectado por esta crise como o cultural en O cambio de
paradigma do sector cultural. Alberto Rodríguez Boó (Managing
Director de Alda Hotels) compartirá como é e será O renacer do
sector turístico. E Margarita Álvarez (fundadora de Working for
Hapiness e expresidenta do Instituto Coca-Cola da Felicidade),
intervirá coa conferencia Deconstruíndo a felicidade en tempos
de incerteza.
Engadir,
por último que a clausura do Talentia Summit será presentada pola
xornalista Marga Pazos e contará co punto musical da cantante
grovense Carolina Rubirosa.