Talentos Inclusivos (CITIC) amplía a súa proxección internacional na Annual CSUN Assistive Technology Conference

O proxecto Talentos Inclusivos, impulsado polo CITIC da Universidade da Coruña (UDC), continúa o seu crecemento e consolidación no ámbito internacional trala súa participación na Annual CSUN Assistive Technology Conference, o principal foro global sobre tecnoloxía e accesibilidade para persoas con discapacidade, celebrado en Anaheim (Los Ángeles, California).
O subdirector do CITIC, Javier Pereira, e a project manager, Irene Brage, acudiron ao evento para presentar os logros e o potencial de Talentos Inclusivos como modelo de innovación que integra TIC, educación e inclusión. Este programa, sinalaron, “fomenta as vocacións STEM entre os mozos e sensibiliza sobre a realidade da discapacidade mediante o desenvolvemento de solucións tecnolóxicas en equipos colaborativos xunto con persoas con parálise cerebral”.
A Annual CSUN Assistive Technology Conference é un referente internacional en accesibilidade e innovación, con 40 edicións ás súas costas. Nesta ocasión, reuniu a máis de 5.000 asistentes, incluíndo persoal investigador, comunidade educativa e profesionais do sector, que debateron sobre o futuro da tecnoloxía asistiva en conferencias maxistrais, demostracións e sesións técnicas.
Fontes do CITIC explicaron que a proxección internacional de Talentos Inclusivos neste congreso súmase á súa participación no programa europeo Erasmus+ EDIGIT: Education and Dixital Literacy to Grow Inclusive Talents, liderado polo centro TIC da UDC na convocatoria de 2024. Esta iniciativa busca reducir a fenda de inclusión de persoas con discapacidade na transición dixital, promovendo enfoques accesíbeis no ensino STEM (siglas de Ciencia, Tecnoloxía, Enxeñaría e Matemática). O seu obxectivo principal é “dotar ao profesorado de ferramentas e competencias para desenvolver metodoloxías inclusivas, aumentando a conciencia do alumnado sobre a discapacidade”.
O consorcio de EDIGIT está formado por seis institucións de cinco países: Academia José Moreira dá Silva e Cooperativa de Estudos de Economía Social (Portugal), Kezenfogva Osszefogas A Foyatekosokert Alapitvany (Hungría), Gymnázium Jiřího Gutha-Jarkovského (República Checa), ASPACE Coruña e On Projects Advising SL (España), Polo Europeo della Conoscenza – IC Bosco Chiesanuova (Italia)
Con cinco anos de traxectoria, Talentos Inclusivos conseguiu un impacto significativo na comunidade educativa e tecnolóxica. Desenvolveu máis de 70 solucións tecnolóxicas para mellorar a calidade de vida de persoas con discapacidade, impulsando a ciencia inclusiva como piar fundamental.
Na edición de 2024, o programa contou coa participación de 15 colexios de Galicia, involucrando a máis de 500 estudantes e 50 persoas con discapacidade no desenvolvemento de solucións tecnolóxicas innovadoras.
Na actualidade está a cursarse a quinta edición, con representación de centros educativos de toda a comunidade galega que están a desenvolver un total de 59 retos tecnolóxicos.
Un dos últimos recoñecementos obtidos foi o Premio Ciencia e Valores Humanos, na XXV edición concurso Ciencia en Acción, o que supón, en palabras do centro coruñés, “un novo impulso para seguir desenvolvendo proxectos innovadores e accesíbeis que contribúan a unha sociedade máis equitativa”.