Telefónica lanza a II edición do concurso de ciberseguridade para os colexios

Logo da importante repercusión da primeira convocatoria, na que participaron máis de 1.600 escolares de 38 colexios galegos, Telefónica promove na nosa terra a II edición do concurso Ciberseguridade no cole! para alumnos de 10 a 14 anos. Está dirixido ao alumnado de 5º e 6º de primaria e 1º e 2º da ESO, e o prazo de inscrición para participar estará aberto até o vindeiro 10 de outubro ás 12h. O obxectivo é favorecer as navegacións seguras na contorna escolar e facilitar que a rapazada poida adquirir os coñecementos e as ferramentas necesarias para facer fronte aos riscos que entraña o uso dos medios dixitais, ademais de promover unha cultura de ciberseguridade entre os adolescentes.
Para poder participar no concurso os centros de primaria e secundaria deberán inscribirse nun formulario vía web na ligazón específica habilitada pola operadora.
Os centros educativos participantes no concurso e que rexistren correctamente o formulario serán informados o 13 de outubro vía correo electrónico dos detalles da súa participación e os requisitos técnicos (equipo informático con conexión a Internet) necesarios para a primeira fase inicial online do certame, que se celebrará o 20 de outubro. Telefónica sinala que será “requisito necesario rexistrarse utilizando un correo electrónico do propio centro escolar para validar a participación”. Logo daranse a coñecer os 3 equipos finalistas de cada categoría (Primaria e Secundaria), que serán convidados a participar na fase final presencial que se celebrará o día 10 de novembro na Cidade da Cultura de Santiago durante o Encontro CIBER.gal, onde serán anunciados os gañadores.
Os detalles máis relevantes do concurso e as súas bases legais poden consultarse no portal da Consellería de Educación na seguinte ligazón.