Telefónica lembra que máis da metade da poboación galega pode gozar xa da súa fibra óptica
xoves, 23 de xaneiro do 2020
Telefónica
comezou o ano facendo un exhaustivo balance sobre a presenza de fibra
óptica de seu na nosa terra (Internet ultrarrápida para os nosos
concellos). Segundo fixo saber a operadora,
a día de hoxe máis da metade da poboación galega pode gozar do
devandito servizo FTTH (Fibra até o Fogar polas súas siglas en
inglés). Respecto deste ano que vimos de deixar atrás, o 2019,
un total de 125.721 novas vivendas e negocios incorporáronse á
zona de cobertura da infraestrutura habilitada por Telefónica, o que
representa un incremento do 14,5%.
Estes
avances insírense na estratexia de Telefónica de brindar a Galicia
tecnoloxías de última xeración a través de iniciativas de
colaboración público-privada, unha estratexia que, como dixemos,
fixo posíbel que co remate de 2019 máis da metade da poboación da
Comunidade autónoma contase con cobertura de fibra óptica (FTTH) da
multinacional dixital, e que en municipios moi rurais como Sarreaus
(Ourense) ou Meira (Lugo) a cobertura chegase ao 100%.
Como
se dixo, ao longo de 2019 sumáronse 125.721 unidades inmobiliarias
(vivendas, locais, negocios, empresas, polígonos industriais, etc.)
até totalizar 987.842 UUII, un 14,58 % máis que no exercicio
anterior. A previsión é que este ano outras 148.216 unidades
inmobiliarias entren en cobertura con FTTH, aumentando en máis dun
8% a poboación galega que poderá gozar da fibra óptica de
Telefónica.
A
operadora engade que están previstos ao longo do ano despregues en
localidades do catro provincias galegas para completar a extensión
da fibra óptica en municipios como Bergondo (A Coruña), Caldas de
Reis (Pontevedra), Boborás (Ourense) ou Castroverde (Lugo),
abranguendo tamén núcleos “dispersos e orograficamente
complexos”, en palabras da compañía, que engade que o
fornecemento de fibra óptica en Galicia “realizouse con recursos
propios da compañía e cos achegados polos programas de axudas de
extensión de banda larga das administracións autonómica e
central”.
Cousas
que fai posíbel a fibra óptica
A
empresa de telecomunicacións explica que a fibra óptica permitirá
aos usuarios de Telefónica “ir incrementando o uso de banda larga
nos vindeiros anos na medida que a progresiva dixitalización das
actividades particulares, profesionais e empresariais así o esixa”.
A
operadora tamén lembra que a fibra óptica de Movistar ofrece “voz
con alta calidade nas chamadas, máxima velocidade de conexión a
Internet e a a posibilidade de conectar varios dispositivos
(computador, tableta, móbil) a Internet de xeito simultáneo sen
reducir velocidade de conexión, entre outras vantaxes”. Ademais,
se o usuario dispón de Movistar+ terá acceso a canles de alta
definición co dobre de resolución que a TDT ou o DVD e poderá
gozar dos seus contidos mentres navega por Internet. Igualmente
conseguirá unha maior interacción en xogos en rede cunha conexión
fluída e sen cortes.