Telefónica reforza a súa rede en Galicia para o verán

Telefónica puxo en marcha o seu plan de verán en Galicia, que inclúe o reforzo da cobertura en eventos multitudinarios, melloras na infraestrutura de telecomunicacións, novas despregaduras na costa e un dispositivo específico para as zonas nas que o eclipse solar do próximo 12 de agosto será especialmente visible.
Ata o 15 de setembro, a operadora realizará tarefas de monitorización e optimización da súa rede en 74 eventos distribuídos por toda Galicia, coa axuda de unidades móbiles equipadas con tecnoloxía 5G de altas prestacións e actuacións de parametrización avanzada. Do total de citas previstas entre xuño e setembro, 23 celebraranse na provincia da Coruña, 19 na de Pontevedra, 11 na de Lugo e 8 na de Ourense.
As unidades móbiles despregadas están deseñadas para reforzar a conectividade en festivais, concertos e outras grandes concentracións de público. Estes equipos permiten incrementar temporalmente a capacidade da rede e a velocidade de transmisión de datos en zonas onde a demanda de servizos móbiles se dispara durante determinados momentos do ano.
O director de Operacións, Rede e TI de Telefónica España, Sergio Sánchez, asegurou que «Telefónica asume o reto indiscutible de converterse na mellor vía de acceso dos cidadáns ás tecnoloxías dixitais. Contamos coa mellor rede para ofrecer máis e mellores servizos alí onde os nosos clientes máis o necesitan, especialmente en momentos de máxima concentración turística como este período estival».
O dispositivo para a campaña estival inclúe tamén actuacións de optimización sobre infraestruturas xa existentes e novas despregaduras na costa galega, concretamente na Coruña, Arteixo, Ferrol, Pontevedra e Sanxenxo.
A cobertura 5G da operadora alcanza actualmente máis do 95 % da poboación española e está dispoñible en máis de 6.200 municipios a través das bandas de 3.500 MHz, 700 MHz ou ambas. En Galicia, a cobertura chega igualmente ao 95 % da poboación e supera os 280 concellos con acceso a esta tecnoloxía.
De cara á eclipse solar do 12 de agosto, Telefónica prepara un reforzo específico da rede nas comunidades onde se agarda unha maior afluencia de observadores, entre elas Galicia. As actuacións previstas inclúen axustes técnicos destinados a optimizar o funcionamento da rede móbil ante a chegada de visitantes nacionais e internacionais.
No conxunto de España, o plan de verán contempla o reforzo da cobertura en 441 eventos mediante 109 unidades móbiles, ademais da ampliación da rede con novas instalacións en 34 localidades costeiras e máis de 500 actuacións sobre a infraestrutura existente.
Entre os dispositivos especiais previstos destacan as sete unidades móbiles destinadas ao Gran Premio de Fórmula 1 de Madrid e as catro que acompañarán o percorrido da Volta Ciclista a España.