Telefónica reforzará a cobertura móbil de Boimorto de cara ao Festival da Luz

Telefónica reforzará cunha unidade móbil a cobertura da rede 5G en Boimorto para atender as necesidades de conectividade co gallo do Festival da Luz, que se celebra entre o 23 e o 25 de agosto e congregará a centos de visitantes. Dará así resposta ao incremento da demanda de voz e datos prevista durante o evento, motivada pola afluencia de visitantes e o uso cada vez máis intensivo de dispositivos móbiles.
A acción forma parte do plan verán 5G que a Telefónica despregou un ano máis en Galicia para aumentar a capacidade da rede en 43 destinos turísticos de costa e 6 de interior con unidades móbiles temporais ou instalacións que permanecerán concluído o verán.
En total, dos 73 municipios turísticos nos que Telefónica xa está presente con 5G en Galicia, na provincia da Coruña reforzou con accións especiais 24 deles con gran afluencia de visitantes estivais. O obxectivo é intensificar a súa cobertura, así como a de 40 eventos que se desenvolven entre os meses de xuño e setembro en diversos puntos da súa xeografía, como é o caso do Rally de Ferrol, a Romaría de San Ramón de Moeche, a Festa da Empanada de Carral, a Romaría da Virxe da Barca en Muxía ou a Festa da Pataca en Coristanco.