Telefónica será o provedor de servizos móbiles de Fujitsu en Europa

venres, 11 de marzo do 2011 Raquel Noya

Fujitsu, o cuarto maior provedor global de servicios TIC en todo o mundo, vén de seleccionar a Telefónica como responsable das comunicacións móbiles de voz e datos da compañía en Europa durante os vindeiros 4 anos.
O contrato, asinado recentemente, implica a provisión de servizos móbiles a 30.000 conexións en 15 países, e conta para o seu desenvolvemento con 30 millóns de euros.
Os seus precursores, califican este convenio como “un logro significativo” posto que máis do 60 por cento destas conexións migrarán á rede da operadora nacional.
Telefónica Multinational Solutions será, xa que logo, a unidade responsable tanto da xestión e desenvolvemento integral do servizo ao cliente como do servizo post-venda nos países que cubre o acordo, funcións que realizará a través da coordinación coas unidades de negocio locais de Telefónica e cos socios pertinentes dos distintos países.
Segundo informan, Fujitsu apostou por Telefónica debido “á súa oferta de servizos centralizados e pola súa capacidade de xestión con operadoras locais en países clave para as operacións da compañía xaponesa”.
Malia que o acordo tamén inclúe países onde non opera Telefónica, Fujitsu confía na compañía española para obter “unha maior eficiencia, mellora na calidade do servizo e as conseguintes economías de escala”, ao tempo que, segundo engaden, “a expansión futura destes servizos no resto de países nos que opera”.
O responsable de vendas de Telefónica Multinational Solutions, Simon Lee-Smith, mostrou a súa satisfacción pola sinatura do acordo e puxo de manifesto que a compañía que representa “é un xogador forte no mercado, que conta coa capacidade de mobilizar recursos en todo o mundo”, xusto á medida do que a compañía nipona andaba a buscar.

PUBLICIDADE