Telegram podería ter que someterse á Lei de Servizos Dixitais

Nun momento no que Telegram está a cumprir 11 anos de vida e celebrar que superaron os 950 millóns de usuarios activos ao mes, temos tamén que o seu fundador se enfronta a graves acusacións ante a Xustiza francesa, e agora tamén a Comisión Europea estaría a ter a compañía baixo a lupa por desconfiar do número de usuarios que manifesta ter en Europa.
A Comisión Europea ve con total desconfianza que Telegram asegure ter 41 millóns de usuarios activos na Unión Europea, pois semella que esa cantidade declárase unicamente para quedar por debaixo dos 45 millóns de usuarios que fixa a Lei de Servizos Dixitais (DSA) para aplicarse, e tal información non parece corresponderse en absoluto coa información que se viña manexando, xa que entendíase que o 27% dos usuarios de Telegram estaban en Europa, ou sexa, que superarían en varias ordes de magnitude o límite establecido pola DSA.
O mero feito de tentar enganar á Comisión Europea para non ter que cumprir coa lexislación xa podería considerarse unha infracción, pero o importante neste conflito (que precisará resolverse mediante unha auditoría externa) é que de confirmarse que Telegram debe someterse á DSA complicaríanselle moito as cousas, xa que as esixencias desta lei supoñen que a compañía teña uns sistemas de control e un nivel de colaboración dos que claramente carece, pois é precisamente por iso polo que Pavel Durov terá que responder ante a Xustiza gala.