Televés presenta un revolucionario e avanzado medidor de campo para instaladores de telecomunicacións
mércores, 17 de xullo do 2019
Televés
presentou este mes de xullo un novo e revolucionario dispositivo para
facilitar o traballo dos instaladores profesionais. Trátase
de MOSAIQ6, un medidor de campo de alto rendemento que conta, en
palabras da empresa de telecomunicacións de Santiago, “coas
mellores funcionalidades para a análise e o calibrado dos sinais de
televisión, en todos os seus formatos e modulacións”.
A
nova tecnoloxía ten dúas vertentes fundamentais. Por unha banda,
trátase dun dispositivo analizador de espectro de sinal que dispón
de “altas prestacións e funcionalidades avanzadas”, achegando
precisión e exclusividade na análise de sinais de televisión,
sexan moduladas na banda TDT, por satélite ou por cable. Doutra
banda, e grazas ao estreito traballo conxunto de Televés (o seu
equipo de desenvolvemento) cos instaladores profesionais, MOSAIQ6
salienta pola súa sinxeleza e facilidade de uso: achega unha
interface táctil, comandos xestuais, unha ergonomía que facilita a
súa manexo e a realización das diversas tarefas de medición
durante unha instalación.
Amais,
o aparello é quen de analizar, medir e diagnosticar sinais de canle
de retorno, radio, DAB e DAB+, televisión, fibra óptica, WiFi ou
IPTV, así como análise de ecos, o que “permite ter un diagnóstico
completo que garante unha instalación exitosa en calquera
escenario”, explica Televés.