The Humble Bundle pon á venda un lote de xogos de THQ

Nos últimos meses conseguiron moito éxito distintos lotes de xogos independentes baixo o selo de The Humble Bundle, que permitían a súa compra pagando a vontade e elixindo o reparto dos cartos entre desenvolvedores, organizadores da venda e entidades sen arela de lucro (concretamente Child’s Play e a Cruz Vermella dos EE.UU.), iniciativa que na súa historia conseguiu achegar máis de 7,85 millóns de dólares a fins benéficos, e que agora vai apuntar moi alto grazas ao apoio de THQ, compañía que ofrece mediante esta fórmula un grupo de xogos que normalmente terían un valor conxunto de 190 dólares.

A xente que pague dende 1 dólares poderá facerse coas claves de descarga a través de Steam dun nutrido grupo de xogos para Windows: Darksiders, Metro 2033, Red Faction: Armageddon, Company of Heroes, Company of Heroes: Opposing Fronts, Company of Heroes: Tales of Valor e, para quen pague máis que a media, Saints Row: The Third. O lote tamén inclúe 5 bandas sonoras libres de DRM.
Esta promoción estará dispoñible durante un par de semanas nas que é de agardar que superen todas as marcas de recompilacións anteriores.

Vídeo promocional do novo lote de xogos incluíndo en The Humble Bundle