The Legend of Zelda: Tears of the Kingdom sae á venda

Os seareiros das aventuras de The Legend of Zelda teñen hoxe motivos para estar contentos, xa que por fin chegou oficialmente ás tendas a súa nova entrega para Nintendo Switch, Tears of the Kingdom, que mantén a esencia de Breath of the Wild depurándoa aínda máis e demostrando que a Switch aínda pode dar moito de si.
Neste novo xogo estamos nun Hyrule reconstruído tras os acontecementos da anterior entrega, con lugares familiares que mudaron drasticamente, novas aldeas, covas e misteriosos abismos esparexidos a través do mundo, así como misteriosas illas flotantes que apareceron nos ceos e que agochan moitos segredos que haberá que desvelar.
Tears of the Kingdom incorpora novas e poderosas habilidades de Link para crear audaces armas e construír creativos xeitos de viaxar a través do territorio. Son moitos os detalles que renovan este xogo para manter o interese, e pese a que o título leve un par de semanas filtrado, polo que hai moitas sorpresas que se estragaron nos últimos días, quen soubo afastarse da conversas ao redor do xogo seguro que gozará da experiencia do que para moitos será o xogo do ano para a consola de Nintendo.