Threads podería chegar a Europa en decembro

Threads está a incorporar a busca mediante palabras clave, para así poder localizar conversas sobre unha temática determinada

The Wall Street Journal publica a nova que moitos levaban meses agardando tras ver o mal funcionamento de X/Twitter e a pouca relevancia que están a conseguir alternativas como Mastodon e Bluesky: a chegada de Threads a Europa está prevista para o mes de decembro.
Lembremos que a plataforma de texto que Meta lanzou a partir de Instagram non estaba accesible dende Europa xa que tiña serios problemas para cumprir coa lexislación de protección de datos local (detalles como que a nova plataforma estivese totalmente ligada a unha plataforma anterior e que non houbese transparencia co tratamento de datos eran problemas que estaban sen solucionar), e nas últimas semanas puidemos ver como moitas das grandes carencias de Threads foron suplíndose, de aí que en decembro poderiamos ter o desembarco europeo desta plataforma que podería recuperar o seu pulo inicial grazas a o que case sería un relanzamento.
Cómpre salientar que Threads xa non é unha aplicación tan básica como ao comezo, e neste momento está a incorporar a busca por palabras chave en todos os idiomas, ou sexa, que vai camiño de ter algo semellante ao cancelos, o que facilitará a participación en conversas amplas, aínda que non podemos esquecer que a intención de Meta é que Threads estea lonxe de discusións políticas e outros tipos de conversas que poidan provocar un ambiente tóxico, polo que realmente non será unha alternativa total a X/Twitter, podendo verse como unha versión máis amable, que como grande vantaxe ten o doado que resulta entrar para quen xa teña unha conta en Instagram.
Agora que X/Twitter está a vivir o que parece ser o seu peor momento, co abandono de importantes anunciantes e a groseira reacción de Elon Musk ante tal situación provocada por el mesmo, Meta ten unha oportunidade magnífica para promover o uso de Threads, pese a que aínda sexa unha plataforma en desenvolvemento, pero que parece ser a única opción solvente para coller o relevo de Twitter a longo prazo (agás, claro está, que Musk venda a plataforma, e así poida volver ao rego).