Thunders UVigo proclámase subcampión de España da League of Legend
luns, 19 de xuño do 2017
Para
quen non saiba que son os eSports, dicirlle que son
actividades de lecer dixital nas que entran en xogo (e nunca mellor
dito) competicións de videoxogos, por unha banda, e internautas a
título individual ou en grupos do mesmo xeito que se foran
deportistas tradicionais, pola outra. Dito isto, cómpre sinalar que
a nosa terra comeza dende hai tempo a despuntar neste ámbito
deportivo-electrónico. Un exemplo é a traxectoria do equipo
universitario vigués de eSports, os Thunders UVigo. Esta
mesma fin de semana que vimos de deixar atrás, sen ir máis lonxe, o
cadro proclamouse subcampión de España da League of
Legends na final da liga universitaria de eSports (OGSeries
University) celebrada no Polideportivo Antonio Magariños de
Madrid.
Segundo
lembraron os seus integrantes, malia ser debutantes na competición,
dende o principio deron sinais claros de que podían chegar á final
e acadar o primeiro posto, aínda que finalmente non puidera ser.
Chegamos con moitas forzas tras vencer aos Stingrays de Valencia,
pero tamén conscientes de que a batalla non ía ser doada”,
explicou Javier Carrera Gravity, un dos integrantes do equipo,
quen salientou que, “pese a todo, estamos moi satisfeitos, xa que
foi unha experiencia fantástica”.
Agora,
rematada liga universitaria, toca descansar até a vindeira tempada.
Porén, os integrantes de Thunders UVIgo seguirán en activo en
varias competicións, aínda que a título indivisual.
Xunto
a Gravity, estudante de Ciencias do Mar, o cadro vigués está
integrado por Mario González, Yurner0s, que este curso remata
Enfermería, o estudante de Enxeñaría Informática Pablo González
Peiboll, o alumno de Enxeñaría de Telecomunicación, Iago
Pallares Epsyle e Pablo Vilaboa Speiwalker, que cursa
Enxeñería Mecánica. Segundo lembra Gravity, se ben o equipo
ten as portas abertas a novas incorporacións “non xogamos tantos
partidos como para precisar un número moi elevado de suplentes, de
feito, non deberiamos ser máis de seis”.