TikTok podería ter que pagar unha sanción de 500 millóns de euros por enviar datos persoais a China

Un par de comisarios do organismo de protección de datos irlandés xuntáronse esta mesma semana co ministro de Xustiza Jim O’Callaghan

Bloomberg asegura que antes de rematar o presente mes a Comisión de Protección de Datos de Irlanda emitirá unha sanción a TikTok por mor das vulneracións do Regulamento Xeral de Protección de Datos vixente na Unión Europea, que podería superar os 500 millóns de euros.
Estamos ante a resolución dun expediente aberto hai 4 anos, por mor das transferencias por parte de ByteDance de datos persoais de usuarios europeos a China, onde eran accesibles a enxeñeiros da compañía.
Esta multa chega nun momento moi sensible para TikTok, xa que está a piques de rematar o prazo que deu Donald Trump ao tomar posesión da presidencia dos EE.UU. para solucionar o problema provocado pola prohibición da aplicación social no territorio estadounidense, que segue en vigor mentres TikTok continúe a ser unha compañía que consideren que está baixo o control chinés.