Todo listo para a celebración no Gaiás do 8º Scratch Day do CPETIG e AMTEGA

venres, 6 de outubro do 2023 S. P.

Finalmente este sábado 7 de outubro celébrase en Santiago a oitava edición do #ScratchDay do Colexio Profesional de Enxeñaría Técnica en Informática de Galicia – CPETIG. Desenvolverase en horario de 9 a 14 horas, no Edificio CINC da Cidade da Cultura de Santiago de Compostela (monte Gaiás). Haberá 2 grupos: o conformado por rapaces e rapazas de 6 a 16 anos, traballando conxuntamente cos seus pais/nais e o de profesores que queiran incorporar esta linguaxe de programación aos seus centros educativos.
O Scratch Day é unha das actividades máis destacadas da colaboración que o ente colexial mantén coa Axencia para a Modernización Tecnolóxica de Galicia (AMTEGA). A xornada está deseñada para achegar á rapazada, pero tamén ás nais, aos pais e ao profesorado, ás novas tecnoloxías, á linguaxe de programación e á informática.
O Scratch Day 2023 estará centrado na temática da gamificación e do entorno dos videoxogos. Os tres públicos obxectivos aos que se dirixe esta actividade lúdico-formativa son: nenos e nenas de idades comprendidas entre os 6 e os 16 anos; os seus pais, nais ou titores, e a comunidade de profesores, formadores e directores de centros de ensino interesados en aplicar a tecnoloxía e a linguaxe Scratch nas súas aulas. Esta formación teórico-práctica desenvolverase o vindeiro sábado 7 de outubro en formato intensivo de 9:00 a 14:00 horas no salón de convencións do edificio CINC da Cidade da Cultura de Santiago de Compostela.
O programa da actividade para as familias inclúe unha primeira aproximación ao entorno Scratch, cunha parte didáctica de como mover, lanzar e interactuar con obxectos para programar un videoxogo básico. Ademais, traballaranse as interaccións a través da cámara e do son e a linguaxe de programación con Microbit permitirá empregar a radio e o control remoto entre dispositivos.
As nenas e nenos participantes crearán o xogo do número segredo, xogos de scroll, un dado dixital, unha busca do tesouro e un videoxogo con LEDs.
No módulo específico para profesores e formadores, traballaranse obxectos, escenarios e bloques de programación, así como o movemento, a animación e a interacción entre eses obxectos. Por último, haberá tempo para o desenvolvemento dun videoxogo básico. A maiores, segundo informou o CPETIG, habilitarase a creación de unidades didácticas para contido curricular e abordarase un traballo transversal con Scratch e Microbit.
“Unha das grandes novidades desta edición será a presentación dun caso de éxito no uso de tarxetas Microbit nun colexio, que aplicou esta tecnoloxía a un proxecto para implantar un sistema de rego no centro”, explica o CPETIG, engadindo que o programa está enmarcado dentro das áreas STEM (polas súas siglas en inglés de Ciencia, Tecnoloxía, Enxeñaría e Matemáticas) e conta cunha importante experiencia entre a comunidade escolar galega nas edicións preferentes, collendo o relevo dentro do calendario de actividades do CPETIG do programa #GirlSteam, que percorreu 15 concellos de Galicia para amosar o uso das novas tecnoloxías do stop motion e dos tecidos intelixentes entre a mocidade.

PUBLICIDADE