Todos os vídeos que se compartan en Facebook serán considerados Reels

Facebook vén de anunciar unha importante actualización na súa plataforma de vídeo: a partir dos vindeiros meses, todos os vídeos que se publiquen na rede social pasarán a compartirse como Reels, sen importar a súa duración ou formato. Deste xeito, tanto vídeos curtos como longos pasarán a convivir baixo o mesmo paraugas. A compañía busca así simplificar a experiencia dos usuarios e promover unha interacción máis dinámica coa contorna audiovisual da plataforma.
Esta decisión responde á vontade de integrar nun único fluxo creativo os procesos ata agora diferenciados de subir vídeos ao Feed ou crear Reels. A nova experiencia de publicación ofrecerá acceso a máis ferramentas creativas e permitirá aos usuarios escoller con precisión o público co que queren compartir o seu contido.
No marco desta renovación, Facebook tamén unificará os axustes de privacidade para as publicacións no Feed e os Reels. Os usuarios serán convidados a revisar ou modificar o seu público predeterminado ao comezar a empregar o novo sistema. A plataforma garante que se manterán os controis actuais, permitindo compartir contidos con amigos, grupos específicos ou facer publicacións públicas para ampliar o alcance.
A nivel visual, a sección de vídeo da aplicación tamén se transforma: a anterior lapela de Vídeo pasará a chamarse Reels, aínda que continuará ofrecendo contidos de diversa duración e temáticas, personalizados en función dos intereses de cada usuario.
Os vídeos xa publicados seguirán dispoñibles nos perfís e páxinas, mais a partir de agora, calquera novo contido en vídeo que se suba a Facebook será automaticamente un Reel. A despregadura destes cambios será gradual e aplicarase en todo o mundo tanto a contas persoais como a páxinas profesionais.