Tres alumnos do Campus de Ferrol achéganse ás aventuras gráficas cunhas prácticas en Péndulo

mércores, 28 de xuño do 2023 S. P.

Pedro Hernández Crespo, Boris Cisneros García e Daniel Cuerva Vidales, alumnos do Mestrado en Deseño, Desenvolvemento e Comercialización de Videoxogos que se imparte na Escola Politécnica de Enxeñaría de Ferrol (EPEF), están a realizar as súas prácticas en Péndulo Studios, unha empresa desenvolvedora de videoxogos con case 30 anos de experiencia que pon o foco nas aventuras gráficas.
No seu haber contan en 1994 coa que foi a primeira aventura gráfica española: Objetivo Uikokahonia. Logo virían outros xogos como Hollywood Monsters (1997), a saga Runaway (2001, 2006 e 2009), Yesterday (2016), BlackSad (2019) ou Alfred Hitchcock Vértigo (2021). En palabras da UDC, o estudio é a día de hoxe “o máis activo e lonxevo da industria en España”.
Os tres estudantes do Campus Industrial de Ferrol mergulláronse na elaboración do último dos videoxogos que está a preparar o equipo de Péndulo Studios e que se titula Tintín. Los Cigarros del Faraón. Será novamente unha aventura gráfica que levará aos seareiros de viaxe por Exipto até Arabia, na pel de Tintín e na compaña do cadelo Milú.
Pedro Hernández Crespo, graduado en Enxeñaría Informática pola Universidade de Vigo (UVigo), sumouse ao Departamento Técnico achegándose ás funcións dun programador de gameplay. Boris Cisneros García, titulado en Comunicación Audiovisual pola Universidade da Coruña (UDC), integrouse no Departamento de Calidade onde testa todos os niveis e as mecánicas do xogo para atopar posibles erros. Por último, Daniel Cuevas Vidales, graduado tamén en Enxeñaría Informática pola Universidade de Vigo (UVigo), uniuse ao Departamento de Animación coñecendo de primeira man as funcións que realiza un animador 3D.

PUBLICIDADE