Tres firmas innovadoras de Yuzz Santiago e Lugo participaron na final do reality Enfoca-2
luns, 29 de maio do 2017
- Os impulsores de OpSeeker e E-Wear
Os
centros Yuzz de Santiago
e Lugo están de
celebración. E non é para menos. Máis polo miúdo, dúas firmas
innovadoras que contan con acubillo e palestra no centro compostelán
(E-Wear e OpSeeker), e outra na de Lugo (Legalmit), foron
seleccionadas para participar este sábado na final do
reality televisivo Enfoca-2, que se desenvolveu en Madrid.
E fixérono tras seren seleccionadas entre 246 empresas de novas
creación, start-ups.
Na final, un total de 10 proxectos tentaron conseguir o apoio e o
financiamento dalgún membro do grupo de investidores que conformaba
o xurado do programa. Entre os investidores atopábanse empresas e
entidades referencias a nivel estatal e internacional, como o ICEX,
Telefónica Open Future, Blusens, Caja Rural Zamora, Alsa National
Express, TAIGER, Itika, Dental Com, Gerosol, 1A Igenieros, Míster
Nutrición, Altran e a Xunta de Castela e León.
Os
dous proxectos participantes por Compostela foron E-Wear e OpSeeker.
O primeiro, informa Yuzz Santiago, é unha iniciativa de dous
emprendedores novos, estudantes da Universidade de Santiago de
Compostela, Carlos García Campos (estudante de ADE) e Ángel
Rodríguez Cerdeira (estudante de Enxeñaría Informática). Segundo
informaron Carlos e Ángel, E-Wear “é un asistente persoal para
persoas con principios de alzhéimer e da terceira idade co obxectivo
de mellorar o día a día tanto delas como dos seus coidadores ou
familiares”. Trátase, engadiron, dun proxecto que naceu da
necesidade persoal dos emprendedores, que sufriron nas súas familias
os problemas da vellez.
Opseeker,
pola súa banda, é unha start-up constituída en Santiago de
Compostela destinada a mellorar o sistema actuais e vindeiros de
asesoramento financeiro. Vén da man de Gonzalo Camiña Ceballos de
28 anos e Lucie Hefnerová de 27 anos, que sitúan a orixe da súa
iniciativa nos cambios demográficos que está a experimentar a
sociedade na que vivimos, uns cambios que sitúan o aforro e o
investimento particulares como claves “para mantermos” unha boa
calidade de vida no futuro. O seu proxecto consiste nun planificador
financeiro en liña que asesora en que debemos investir ao tempo que
fornece un ambiente 100% seguro para que poidamos probar as
estratexias de investimento para longo prazo sen ningún tipo de
risco.
- As creadoras de Legalmit
O
proxecto de Yuzz Lugo, Legalmit, promovido polas irmás María e
Leticia Seara constitúe unha firma tecnolóxica de base xurídica
que nos permite conectar a tempo completo con avogados cos que
poderemos realizar acordos legais, en liña e perfectamente válidos,
a través de vídeo conferencia certificada.
Este
tres empresas tiveron a oportunidade de mostrar o talento galego,
demostrando “unha vez máis que Galicia atópase á cabeza en
canto á xeración de proxectos tecnolóxicos que contribúen
cambiar o mundo que nos rodea”, explicaron dende Yuzz Santiago e
Lugo.
Yuzz,
como lembraremos, é unha iniciativa do Banco Santander a través do
Santander Universidades e coordinado polo Centro Internacional
Santander Emprendemento (CISE) e que conta co apoio da Universidade
de Santiago de Compostela (nos Campus de Santiago e Lugo) e a Xunta
de Galicia.