Trinta desenvolvedores de servizos públicos participaron nas sesións de Ponte GovJam
luns, 9 de xuño do 2014
Celebrouse esta fin de
semana en Pontevedra, tal e como viñemos anunciando, o
encontro-certame Ponte GovJam,
edición galega dun evento internacional que se desenvolve en medio
centenar de países e que se coñece como Global GovJam. O evento
pontevedrés, no que participaron 30 persoas, compartiu as arelas e
os obxectivos do programa xeral no que se insire: convocar a
cidadáns, funcionarios públicos e especialistas en innovación coa
finalidade de deseñar e dar forma a servizos públicos en só 48
horas. Este traballo realízase en grupos e en base a un reto
comunicado o día anterior para tódalas edicións internacionais do
evento. Nesta edición, o reto foi a palabra (T)RUST,
confianza-ferruxe.
Todos os proxectos foron
compartidos baixo licenza Creative Commons na páxina global de
GovJam, www.govjam.org, onde se
poden consultar tamén os proxectos dos participantes do resto de
países, un total de 48.
Por certo que a edición
pontevedresa do certame desenvolveuse baixo o lema Non falar,
facer, e nela contouse co asesoramento e coordinación de África
Rodriguez e Maria Pierres, xestoras de Espazo Arroelo, sede de Ponte
GovJam e espazo de coworking para novos profesionais e novas
iniciativas empresariais da cidade. Tamén se contou coa colaboración
dos mentores Pablo López, Raquel Pedrouso, José Romero Crusat,
Diego Parajó e Roberto Pérez Marijuan, expertos en desenvolvemento
de proxectos e adestramento.
No encontro participaron
persoas de diferentes idades e diferentes sectores, segundo informan
os organizadores “non necesariamente relacionados coas políticas
públicas, pero cunha actitude aberta cara á planificación
estratexia e a innovación na resolución de problemas”. O abano
foi do máis amplo: dende unha nena de 14 anos que ten a súa propia
empresa até consultores, pasando por estudantes e sonidistas,
constituíndose unha “participación do máis satisfactoria e
abríndose o camiño para a terceira Global Jam en Pontevedra, que
xirará arredor da cuestión da substentabilidade”, informaron as
coordinadoras do evento galego. Por certo que os prototipos de Smart
Cities e eAdministración xerados ao abeiro deste evento (logo de
diferentes ensaios, probas e traballos a pé de rúa cos cidadáns de
Pontevedra) foron presentados na sede de Al Lío, unha das empresas
colaboradoras con esta actividade, onde se repartiron os premios: á
idea máis ousada, á máis solidaria, ao prototipo máis orixinal,
ao máis viábel e ao que conta coa mellor experiencia de cliente.