Trump asegura que Microsoft está en conversas para mercar TikTok

martes, 28 de xaneiro do 2025 Marcus Fernández

Pese a que chegou a asinar unha orde executiva prohibindo TikTok nos EE.UU. en 2020, Trump quixo tirar proveito da plataforma nas pasadas eleccións presidenciais

A axencia Reuters asegura que o presidente dos Estados Unidos, Donald J. Trump, declarou ante os medios que Microsoft está en conversas para adquirir TikTok e que lle gustaría ver unha guerra de poxas pola aplicación, aínda que Microsoft rexeitou facer comentarios ao respecto.
TikTok, que conta con preto de 170 millóns de usuarios estadounidenses, estivo brevemente fóra de liña o pasado 19 de xaneiro, ao entrar en vigor unha lei que obrigaba a ByteDance á súa venda a compañías estadounidenses argumentando motivos de seguridade nacional. Aínda que legalmente TikTok e o resto de aplicacións de ByteDance están actualmente prohibidas nos EE.UU., varias compañías decidiron ignorar a lei ante a promesa de Trump de que non se tomarán medidas contra elas cando menos até 75 días despois da entrada en vigor da lei, para dar tempo a buscar unha solución á complexa situación.
Curiosamente Trump foi un dos principais promotores da prohibición de TikTok, o que non impediu que empregase a plataforma de xeito moi activo durante a campaña electoral e que finalmente se posicionase contra a súa prohibición para gañarse o favor do público.
Trump tamén manifestou publicamente que vía con bos ollos que ofse Elon Musk que sen fixese co control de TikTok, aínda que polo momento no se coñece que fixese oferta algunha pola compañía, en contraste con Perplexity AI, compañía que si estaría disposta a facerse con parte da plataforma social.
En calquera caso, semella bastante difícil que ByteDance poida vender a súa división estadounidense, xa que o goberno chinés ten opción de veto neste tipo de decisións, e ten manifestado en numerosas ocasións que non claudicaría ante as presións dos EE.UU.