Trump asegura que os semicondutores non se librarán dos novos aranceis

Trump comeza a Semana Santa desestabilizando a industria dos semicondutores

Durante a pasada fin de semana moitos celebraban que nos EE.UU. aprobasen unha nova excepción arancelaria, de xeito que os ordenadores, os smartphones, os semicondutores e moitos outros produtos de electrónica de consumo quedaban libres dos elevadísimos aranceis impostos ás importacións dende China.
Esta medida estaba vista como un xeito de recuperar a confianza nos mercados, xa que boa parte das industrias estadounidenses depende de importacións da China, e a carga arancelaria prexudicaría seriamente as súas contas por provocar un incremento de prezos de venda que podería conter o gasto e levar aos consumidores a buscar outros provedores en contra do obxectivo inicial de Donald J. Trump ao impor estas cargas (como é promover a fabricación en territorio estadounidense).
Pero Trump non quere que esta concesión se vexa como tal, e acudiu a Truth Social a anunciar que as novas medidas non son unha «excepción arancelaria», senón que están a «revisar os semicondutores e toda a cadea de subministración electrónica» por motivos de seguridade nacional, ou sexa, que compañías como Apple só se librarían dos novos aranceis de xeito temporal, e deberá trasladar parte da súa produción a EE.UU. se queren gozar do favor do presidente.
Nesta liña destaca o feito de que nVIDIA anunciou a súa intención de construír nos EE.UU. fabricas para a produción de supercomputadores para a intelixencia artificial.
nVIDIA asegura que ten previsto construír máis de cen mil metros cadrados de espazo de produción para a fabricación de procesadores Blackwell en Arizona, mentres que os seus supercomputadores de IA fabricaríanse en Texas.
A compañía líder en hardware para a IA ten xa varias instalacións nos EE.UU., e agora ten o compromiso de intensificar a súa produción en pouco máis dun ano, cunhas previsións de crecemento de produción no territorio estadounidense para os vindeiros catro anos.
Temos aquí unha declaración de intencións dunha compañía californiana que claramente busca evitar o impacto dos novos aranceis no seu negocio, estratexia que posiblemente sigan outras compañías estadounidenses nos vindeiros meses, aínda que resulta difícil distinguir os casos nos que se realizará unha auténtica produción local ou cando simplemente se maquillará a situación de cara á galería.