Trump non quere que os iPhones estadounidenses se fabriquen na India

A principios deste mes, o director xeral de Apple, Tim Cook, anunciou que a compañía comezaría a importar iPhones fabricados na India para cubrir a maior parte da demanda nos Estados Unidos, estimando que o impacto dos aranceis nas contas de Apple sería reducido. Pero estes comentarios parecen non ter agradado ao presidente dos EE.UU., Donald J. Trump, quen durante un cumio empresarial celebrado en Doha asegurou que pediu a Cook que deixase de fabricar na India e incrementase a produción dentro dos EE.UU.
O presidente comentou literalmente «Non quero que fabriques na India. Podes facelo, se é para atender o mercado indio, porque a India é un dos países con máis aranceis do mundo», engadindo que non quere máis fábricas de Apple na India, xa que «a India sabe coidarse soa» e esixe que as novas fábricas da compañía da mazá se constrúan en territorio estadounidense.
Nun ton que encaixa coa súa política de presión arancelaria a nivel global, Trump asegurou que Apple aumentaría a produción nos EE.UU., aínda que non deu prazos nin detalles concretos.
As declaracións de Trump prodúcense un día despois de que a India aprobase un proxecto de Foxconn por valor de 435 millóns de dólares para fabricar chips de Apple no país. A compañía leva tempo traballando para ampliar a súa produción na India e reducir a dependencia de China e, de feito, estiman que o 20 % dos iPhone destinados para a venda nos EE.UU. xa se fabrican na India, prevendo que para o ano que vén puidesen chegar ao 100 %.