Twitch limitará as horas de vídeos Destacados e Subidos

As plataformas de vídeo que permiten retransmisións en directo están a dicir adeus á barra libre de almacenamento, e ao igual que Facebook anunciou que os seus directos en vídeo só se almacenarán durante 30 días a partir de agora, Twitch está a anunciar unha limitación do almacenamento de vídeo nas sección de Subidas e Destacados (lembremos que os vídeos en directo xa se conservaban só entre 7 e 60 días).
Coas normas que entrarán en vigor o vindeiro 19 de abril o almacenamento para vídeos subidos en Twitch limitarase a 100 horas, sen importar cando se creasen os vídeos, aínda que salientando que a limitación non se aplica a Emisións Anteriores nin a Clips.
Coidan que este cambio apenas terá un impacto nos usuarios, xa que menos dun 0,5% dos streamers activos superaron o límite de 100 horas, e as canles que xa superaran tal barreira recibirán unha notificación o 19 de febreiro, para darlles tempo de tomar medidas, pois de superar o límite despois do 19 de abril correrán o risco de ver os seus vídeos borrados automaticamente (comezando polos que teñan menos reproducións).
Dende Twitch aseguran ter adoptado esta medida tras comprobar que os Destacados non están a resultar efectivos para atraer a novos espectadores, especialmente se o comparamos cos Clips, pero esta pouca efectividade non impediu que algúns usuarios subisen milleiros de horas nestes formatos, polo que quixeron por cancelas a unha práctica que consideran que non beneficia a ninguén, mentres que o almacenamento dos contidos sempre ten un custo para a compañía.