Twitter avanza na xeolocalización con Twitter Places

martes, 15 de xuño do 2010 Marcus Fernández

Nos últimos meses a xeolocalización vénse a integrar con Twitter de distintos xeitos (ou sexa, tanto dende a aplicación oficial da compañía coma de ferramentas de terceiros) o que avanza agora coa incorporación dos Twitter Places, de xeito que poderán etiquetarse os tuiteos con lugares específicos de xeito que, por exemplo, unha persoa pode indicar que está nun estadio de fútbol ou nun centro de convencións ao facer unha anotación, facilitándose a consulta de comentarios doutros usuarios de Twitter no mesmo punto, o que xa facían servizos coma Foursquare ou Gowalla, cos que Twitter integrarase (de xeito que tamén poderán verse os check-ins feitos a través desas plataformas).
Coma vén a ser habitual, esta nova prestación incorpórase tamén á API do servizo, de xeito que as distintas aplicacións ao redor de Twitter tamén permitirán o uso de Twitter Places.
O servizo de xeolocalización tamén incrementa o soporte de navegadores web, de xeito que agora é posible utilizar tal prestación dende Safari, Internet Explorer, Google Chrome e Firefox.
Twitter Places irase espallando internacionalmente durante os vindeiros días, de xeito que inicialmente aparecerá na versión móbil web do servizo e tamén irase incorporando ás aplicacións móbiles para iPhone, Android e BlackBerry.

PUBLICIDADE