Twitter fai de pagamento unha versión empobrecida de TweetDeck

As limitacións impostas en Twitter a pasada fin de semana comezan a ter consecuencias moi serias para a plataforma, como a perda de confianza por parte de usuarios e anunciantes, que perciben que o servizo vai camiño da desaparición, o que podería ser case literal dende a perspectiva dos buscadores de Internet, pois xa están a detectar que Google está a eliminar dos seus resultados de busca a Twitter ante o feito de que o servizo non permite o acceso aos contidos a usuarios non identificados, ou sexa, que o buscador non pode ler os contidos de Twitter e, en consecuencia, non os amosa como resultado no buscador.
Pero non só está a derrubarse a visibilidade de Twitter, senón que tamén hai outras consecuencias das limitacións de Twitter, como é o feito de que deixou de funcionar TweetDeck. Por desgraza, ante este problema Twitter non decidiu arranxar TweetDeck, senón que directamente matou este servizo moi empregado por usuarios profesionais e insta aos usuarios a acceder á súa versión preliminar, que leva en probas dende o ano pasado, e que conta cun amplo rexeitamento ante as súas moitas carencias, pois aínda que si conta co tradicional sistema de columnas para organizar os fluxos de chíos, non permite amosar á vez información de varias contas de usuario, polo que perde a súa utilidade para a meirande parte de usuarios.
O novo TweetDeck segue sen ter activas as funcións de equipos (outra das súas prestacións básicas), que aseguran que activarán nas vindeiras semanas e, para rematar a faena, anuncian que dentro de 30 días só poderán acceder a TweetDeck os usuarios subscritos a Twitter Blue.
Temos así como TweetDeck non só perde as súas principais funcionalidades, senón que tamén pasa a ser de pagamento. E tamén cómpre salientar que mentres exista unha cota de chíos ao día a ferramenta é totalmente inútil, xa que esgotaría o límite diario a moi pouco tempo, xa que o seu funcionamento baséase na monitorización, polo que os contidos están a refrescarse constantemente sen intervención do usuario.