UE Miniroll, un altofalante portátil, pequeno e potente

A marca Ultimate Ears, propiedade de Logitech, causou sensación en 2015 co seu altofalante sen fíos UE Roll, que leva un tempo descatalogado, e que promete volver en tamaño reducido, pois veñen de pór á venda nos EE.UU. o UE Miniroll, que presenta unhas dimensións de 123 x 105 x 48 milímetros e un peso de 279 gramos.
O UE Miniroll non só reduce o seu volume para ser máis transportable, mantendo unha grande potencia sonora e reprodución musical nítida, senón que tamén presume dunha batería recargable mediante USB-C cunha autonomía de até 12 horas e resistencia IP67 para poder empregarse en espazos exteriores e lugares nos que poida exporse á auga sen temer pola súa integridade. Tamén soporta caídas de até 1,2 metros.
De querermos conseguir son estéreo, podemos emparellar o Miniroll con outros altofalantes iguais, ou incluso engadir máis altofalantes para poder ambientar unha festa, conseguindo un alcance Bluetooth de até 40 metros.
O altofalante, que nos EE.UU. ten un prezo de 79,99 dólares (prevese que en Europa custe 79,99 euros), inclúe unha correa para facilitar a súa colocación fixa ou para transportalo comodamente. Un produto moi atinado, que como principal eiva ten que chegará ao mercado europeo co verán xa rematado.