Últimas prazas para a xornada sobre os retos da ciberseguridade en Galicia do Nodo Ciber.gal

As persoas interesadas en participar na xornada Ciberseguridade en Galicia: perspectiva e visión de futuro, que se celebra o 13 de xuño en Ourense, teñen aínda oportunidade de inscribirse. O encontro, que é de balde, está organizado polo Nodo Ciber.gal en colaboración co Colexio Profesional de Enxeñaría en Informática de Galicia (CPEIG) e a Escola Superior de Enxeñaría Informática (ESEI) da Universidade de Vigo, no Campus de Ourense, na que se celebrará o evento.
O obxectivo é “achegar aos asistentes o forte atractivo deste sector para fomentar a creación de talento especializado, trasladarlles as oportunidades reais que supón especializarse neste eido e que poidan coñecer de primeira man o día a día dun profesional dedicado á materia”, explican as entidades organizadoras.
Nesta xornada colaborarán entidades e persoas referentes neste ámbito como son o Instituto Nacional de Ciberseguridade (INCIBE) e Román Ramírez, coñecido experto en ciberseguridade e fundador da RootedCon, entre outros.
As persoas interesadas poderán inscribirse en modalidade online ou presencial en todas as actividades do programa. Entre elas, destacan unha mesa redonda na que se abordará a actualidade e o futuro da profesión do CISO, que é a figura responsábel da xestión da seguridade e protección da información que manexa unha organización para mantela a salvagarda e previr ciberataques ou roubo de datos. Moderada polo presidente do CPEIG, Fernando Suárez, os relatores participarán expoñendo a realidade e actualidade desta profesión importantes CISOS do tecido empresarial galego e expertos nacionais na materia.
Contarase tamén cun relatorio que abordará a evolución e futuro do Nodo Galego de Ciberseguridade, e con obradoiros prácticos simultáneos, de xeito unicamente presencial, para espertar o interese pola ciberseguridade. Todas estas actividades serán celebradas en horario de mañá o martes 13 de xuño.